2029 ఎన్నికల్లో వైసీపీ తిరిగి అధికారంలోకి రావడానికి కూటమి ప్రభుత్వం పరోక్షంగా సహకరిస్తోందని మాజీ మంత్రి, వైసీపీ సీనియర్ నేత పెద్దిరెడ్డి రామచంద్రారెడ్డి వ్యాఖ్యానించారు. ప్రజలకు అబద్ధాలు చెప్పి, మోసపూరిత హామీలతో చంద్రబాబు నాయుడు అధికారంలోకి వచ్చారని ఆయన తీవ్రంగా విమర్శించారు.
కూటమి ప్రభుత్వం అధికారంలోకి వచ్చినప్పటి నుంచి రాష్ట్ర ప్రజలు తీవ్ర ఇబ్బందులు ఎదుర్కొంటున్నారని పెద్దిరెడ్డి ఆరోపించారు. రైతులు, కార్మికులు, మహిళలు, యువత ఇలా అన్ని వర్గాలు ప్రభుత్వ వైఫల్యాలతో కొట్టుమిట్టాడుతున్నాయని అన్నారు. ఎన్నికల ముందు ఇచ్చిన హామీలను అమలు చేయడంలో ప్రభుత్వం పూర్తిగా విఫలమైందని, ప్రజల నమ్మకాన్ని దెబ్బతీసిందని విమర్శించారు.
చంద్రబాబు నేతృత్వంలోని కూటమి ప్రభుత్వం రోజు రోజుకు ప్రజావ్యతిరేక నిర్ణయాలు తీసుకుంటూ, వైసీపీకి అనుకూల వాతావరణాన్ని సృష్టిస్తోందని పెద్దిరెడ్డి వ్యాఖ్యానించారు. “మాకు పెద్దగా శ్రమ పడకుండా వైసీపీని మళ్లీ అధికారంలోకి తీసుకురావడానికి చంద్రబాబు, కూటమి ప్రభుత్వం తప్పు మీద తప్పు చేస్తోంది” అని ఆయన అన్నారు.
ప్రజల సంక్షేమాన్ని విస్మరించి, రాజకీయ లాభాలకే ప్రభుత్వం పనిచేస్తోందని ఆరోపించిన పెద్దిరెడ్డి, రానున్న రోజుల్లో ప్రజలు తగిన బుద్ధి చెబుతారని అన్నారు. వైసీపీ పాలనలో అమలైన సంక్షేమ పథకాలు, అభివృద్ధి కార్యక్రమాలను ప్రజలు ఇంకా గుర్తు చేసుకుంటున్నారని, అదే 2029లో పార్టీ విజయానికి బలమైన పునాదిగా మారుతుందని ఆయన విశ్వాసం వ్యక్తం చేశారు.