తెలంగాణలోని నిజామాబాద్ జిల్లాలో పెద్దపులి సంచారం స్థానిక ప్రజల్లో భయాందోళనలకు గురి చేస్తోంది. ఈ పులి సంచారంతో మూడు జిల్లాల అటవీ ప్రాంతాల సరిహద్దుల్లో భయానక వాతావరణం నెలకొంది. అటవీ శాఖ అధికారులు తెలిపిన వివరాల ప్రకారం, ఈ పెద్దపులి రోజుకు సుమారు 20 కిలోమీటర్ల మేర సంచరిస్తూ ఒక ప్రాంతం నుంచి మరో ప్రాంతానికి వెళ్తోంది.
ఇటీవల భీంగల్ మండలంలోని దేవక్కపేట అడవుల్లో ఈ పెద్దపులి రెండు ఆవులను చంపి తిన్నట్లు గుర్తించారు. పశువులపై దాడి చేసిన ఘటనలతో గ్రామస్థుల్లో భయం మరింత పెరిగింది. తాజాగా ఈ పులి జగిత్యాల జిల్లాలోని దమ్మాయిపేట గ్రామ పరిసర ప్రాంతాల్లోకి ప్రవేశించినట్లు అటవీ శాఖ అధికారులు వెల్లడించారు.
పులి సంచారం నేపథ్యంలో గ్రామాల్లో అప్రమత్తంగా ఉండాలని అధికారులు ప్రజలకు సూచించారు. ముఖ్యంగా సాయంత్రం తర్వాత అడవుల సమీపానికి వెళ్లకూడదని, పశువులను ఒంటరిగా మేపడానికి తీసుకెళ్లవద్దని హెచ్చరించారు.
అటవీ అధికారులు పులి కదలికలను గుర్తించేందుకు ప్రత్యేక బృందాలను ఏర్పాటు చేసి పగలు, రాత్రి పర్యవేక్షణ చేపట్టుతున్నారు. పులి మనుషులపై దాడి చేసే అవకాశం ఉండడంతో గ్రామస్థులు జాగ్రత్తలు పాటించాలని సూచిస్తున్నారు. ఈ ఘటనతో పరిసర గ్రామాల్లో భయాందోళన వాతావరణం నెలకొంది.