 పేపర్ లీకేజీ వివాదంపై దేశవ్యాప్తంగా ఆందోళనలు వ్యక్తమవుతున్న వేళ, విద్యార్థులకు బాలీవుడ్ స్టార్ హీరో సల్మాన్ ఖాన్ మద్దతు ప్రకటించిన విషయం తెలిసిందే.){kind=link}
నీట్ (NEET) పేపర్ లీకేజీ వివాదంపై దేశవ్యాప్తంగా ఆందోళనలు వ్యక్తమవుతున్న వేళ, విద్యార్థులకు బాలీవుడ్ స్టార్ హీరో సల్మాన్ ఖాన్ మద్దతు ప్రకటించిన విషయం తెలిసిందే. పేపర్ లీక్ అనేది అత్యంత తీవ్రమైన సమస్య అని, విద్యార్థులు శాంతియుతంగా చేపట్టిన ఈ ఉద్యమం ద్వారా దేశంలో ఒక మంచి విద్యావ్యవస్థ ఏర్పాటవుతుందని ఆశిస్తున్నట్లు ఆయన సోషల్ మీడియాలో పోస్ట్ పెట్టారు. అయితే, ఈ ప్రకటన వెలువడిన వెంటనే సల్మాన్పై నెట్టింట తీవ్ర విమర్శలు వ్యూహం మొదలయ్యాయి.
దీనికి ప్రధాన కారణం గతంలో ఆయన తన తండ్రి సలీమ్ ఖాన్తో కలిసి ఒక టాక్ షోలో పాల్గొన్న పాత వీడియో మళ్లీ సోషల్ మీడియాలో వైరల్ కావడమే. ఆ షోలో సలీమ్ ఖాన్ మాట్లాడుతూ.. ‘‘మా ఇంటికి గణేశ్ అనే వ్యక్తి వచ్చేవాడు. అతడు ఎప్పుడు వచ్చినా మా ఇంట్లో అందరూ ఎంతో మర్యాద ఇచ్చేవారు. టీ ఇవ్వండి, కుర్చీ వేయండి అని హడావుడి చేసేవారు. అతడెవరా అని ఆరా తీస్తే.. మా ఇంట్లో వాళ్లకు పరీక్ష పేపర్లు లీక్ చేసేవాడని, అందుకే అతడికి అంత మర్యాదలు చేస్తున్నారని అర్థమైంది’’ అంటూ నవ్వుతూ సరదాగా చెప్పారు. తండ్రి చేసిన ఈ వ్యాఖ్యలకు స్పందిస్తూ సల్మాన్ ఖాన్.. ‘మా నాన్న చెబుతోంది నా గురించే’ అని అప్పట్లో నవ్వుతూ కామెంట్ చేశారు.
ప్రస్తుతం నీట్ అంశంపై సల్మాన్ హితవు పలుకుతుండటంతో, గతంపై ఆయన చేసిన ఈ సరదా వ్యాఖ్యల వీడియోను నెటిజన్లు బయటకు తీసి విమర్శిస్తున్నారు. పేపర్ లీకేజీ లాంటి తీవ్రమైన నేరాన్ని గతంలో ఎలా తేలికగా తీసుకున్నారంటూ ప్రశ్నిస్తున్నారు.
మరోవైపు, నీట్ పేపర్ లీక్ వ్యవహారం రోజురోజుకీ తీవ్రరూపం దాల్చుతోంది. దేశవ్యాప్తంగా విద్యార్థులు, యువజన సంఘాలు పెద్దఎత్తున ఆందోళనలు చేస్తుండగా, విపక్షాలు సైతం ప్రభుత్వ వైఖరిని తప్పుపడుతున్నాయి. ఈ ఆందోళనలకు పలువురు సినీ ప్రముఖులు సైతం మద్దతు తెలుపుతున్నారు. ఈ క్రమంలోనే ఈ కుంభకోణానికి బాధ్యులైన వారిపై అత్యంత కఠిన చర్యలు తీసుకునేందుకు వీలుగా ప్రత్యేకంగా ఫాస్ట్ట్రాక్ కోర్టును ఏర్పాటు చేస్తామని ప్రధానమంత్రి నరేంద్ర మోదీ ప్రకటించడం దేశవ్యాప్తంగా ప్రాధాన్యత సంతరించుకుంది.