టీమిండియా మాజీ కెప్టెన్ రోహిత్ శర్మ సరికొత్త ప్రయాణానికి శ్రీకారం చుట్టారు. క్రికెట్ మైదానంలో తనదైన బ్యాటింగ్ శైలితో అలరించిన హిట్మ్యాన్, ఇప్పుడు బుల్లితెరపై వ్యాఖ్యాతగా అరంగేట్రం చేయనున్నారు. సెప్టెంబర్ 19 నుంచి సోనీ ఎంటర్టైన్మెంట్, సోనీ లివ్లో ప్రసారం కానున్న ప్రముఖ కార్యక్రమానికి ఆయన హోస్ట్గా వ్యవహరించనున్నారు. ‘ఫ్యామిలీ ఫుల్హౌస్ విత్ రోహిత్ శర్మ’ పేరుతో రానున్న ఈ షోలో మల్టీ జనరేషన్ కుటుంబాలు పాల్గొని సందడి చేయనున్నాయి.
ఇప్పటివరకు క్రికెట్ బ్యాట్తో అదరగొట్టిన రోహిత్, ఇకపై గ్రీన్ మ్యాట్పై షోకు విచ్చేసే కుటుంబాల అనుభవాలు, కథలను వింటూ ప్రేక్షకులను అలరించనున్నారు. స్వతహాగా చక్కటి మాటతీరు, చమత్కారధోరణి కలిగిన రోహిత్ను ఈ షోకు హోస్ట్గా ఎంపిక చేయడం ద్వారా నిర్వాహకులు సగం విజయం సాధించారనే చెప్పాలి. తనదైన కామెడీ టైమింగ్తో హిట్మ్యాన్ ఈ షోను ఏ స్థాయిలో నడిపిస్తారనే దానిపై సర్వత్రా ఆసక్తి నెలకొంది.
ఇప్పటికే ఈ కార్యక్రమానికి సంబంధించిన ప్రోమోలు సోషల్ మీడియాలో వైరల్ అయ్యాయి. అందులో రోహిత్ చేసిన అల్లరి, సందడి అభిమానులను ఎంతగానో ఆకట్టుకున్నాయి. రోహిత్ ఆట నుంచి పూర్తిగా రిటైర్మెంట్ ప్రకటించిన తర్వాత చేయబోయే రెగ్యులర్ పని ఇదేనంటూ అభిమానులు సరదాగా కామెంట్లు చేస్తున్నారు.
ప్రస్తుతం టెస్టులు, టీ20లకు వీడ్కోలు పలికిన రోహిత్ శర్మ కేవలం వన్డే ఫార్మాట్లో మాత్రమే కొనసాగుతున్నారు. 2027 వన్డే వరల్డ్కప్ రోహిత్కు చివరి టోర్నీ అయ్యే అవకాశం ఉందనే చర్చ జరుగుతోంది. అయితే ఆయన రిటైర్మెంట్పై వస్తున్న ఊహాగానాలను బీసీసీఐ కార్యదర్శి దేవ్జిత్ సైకియా తోసిపుచ్చారు. రోహిత్ జట్టులో కొనసాగుతాడని, ఆయన భవిష్యత్తుపై అనవసర ఊహాగానాలు చేయవద్దని స్పష్టం చేశారు.
ఇదిలా ఉంటే, టీమిండియా తరఫున రోహిత్ తన చివరి వన్డేను ఇంగ్లండ్తో ఆడాడు. లార్డ్స్ వేదికగా జరిగిన ఆ మ్యాచ్లో రోహిత్ అద్భుతమైన సెంచరీతో మెరిశాడు. ఆ సిరీస్లో మొత్తం మూడు వన్డేలు కలిపి 175 పరుగులు సాధించి అదరగొట్టాడు. ఇప్పుడు క్రికెట్తో పాటు బుల్లితెరపై కూడా తన మార్క్ చూపించేందుకు హిట్మ్యాన్ సిద్ధమవుతున్నారు.