ప్రియుడితో కలిసి జీవించడానికి అడ్డొస్తుందనే నెపంతో ఒక కన్నతల్లి తన ఐదేళ్ల చిన్నారి కూతురిని అత్యంత అమానుషంగా హతమార్చింది. హృదయవిదారకమైన ఈ ఘోర ఘటన కర్ణాటక రాజధాని బెంగళూరులోని కాడుగోడి (Kadugodi) పోలీస్ స్టేషన్ పరిధిలో ఆలస్యంగా వెలుగుచూసింది. ఈ దారుణ హత్యపై బాలిక తండ్రి ప్రవీణ్ ఇచ్చిన ఫిర్యాదు మేరకు పోలీసులు కేసు నమోదు చేసుకుని దర్యాప్తు ప్రారంభించారు.
పోలీసుల కథనం ప్రకారం.. దావణగెరెకు చెందిన ప్రవీణ్కు బెంగళూరుకు చెందిన ప్రియాంకతో 2007లో వివాహం జరిగింది. ఈ దంపతులకు 17 ఏళ్లు మరియు ఐదేళ్ల వయసున్న ఇద్దరు కుమార్తెలు ఉన్నారు. అయితే, కొన్ని సంవత్సరాల క్రితం ప్రియాంకకు తన పాత కాలేజీ ప్రియుడు మోహన్తో మళ్లీ పరిచయం ఏర్పడి అది కాస్తా అక్రమ సంబంధానికి దారితీసింది. ఈ విషయం తెలిసి భర్త ప్రవీణ్ ఆమెను నిలదీయగా.. ప్రియాంక కాపురం చేయనని తెగేసి చెప్పి, విడాకులు కావాలంటూ పట్టుబట్టింది. చివరకు తన ఇద్దరు కుమార్తెలను తీసుకుని భర్తను వదిలేసి ప్రియుడు మోహన్తో కలిసి వెళ్ళిపోయింది.
అయితే, మార్చి 24వ తేదీన ఐదేళ్ల చిన్న కూతురు హఠాత్తుగా ఆకస్మాత్తుగా మరణించింది. బిడ్డ మరణవార్త విని షాక్కు గురైన తండ్రి ప్రవీణ్.. అసలు ఏం జరిగిందని భార్యను నిలదీశాడు. ఆ సమయంలో ప్రియాంక ఒక్కోసారి ఒక్కో అబద్ధం చెప్తూ అనుమానం కలిగించింది. బిర్యానీ తింటూ చనిపోయిందని ఒకసారి.. లేదు ఐస్క్రీమ్ ఇచ్చి ఏసీ ఆన్ చేసి కారులోనే పడుకోబెడితే ఊపిరాడక చనిపోయిందని మరోసారి పొంతన లేని సమాధానాలు చెప్పింది. దానికి తోడు సదరు చిన్నారి కాస్త నల్లగా ఉందని, తన ప్రియుడితో కలిసి తిరగడానికి అడ్డంగా ఉందనే నెపంతో ప్రియాంక ఆ పాపను తరచూ వేధిస్తూ సతాయించేదని తెలిసింది.
తన చిన్న కూతురిని భార్య ప్రియాంక, ఆమె ప్రియుడు మోహన్ కలిసి దారుణంగా కొట్టి, ముఖంపై దిండు లేదా గుడ్డ పెట్టి ఊపిరాడకుండా చేసి పక్కా ప్లాన్ ప్రకారం హత్య చేశారని తండ్రి ప్రవీణ్ కాడుగోడి పోలీసులకు ఆధారాలతో సహా ఫిర్యాదు చేశాడు. రంగంలోకి దిగిన పోలీసులు తక్షణమే స్పందించి ప్రియుడు మోహన్ను అదుపులోకి తీసుకుని అరెస్ట్ చేశారు. అయితే, పోలీసుల ఎంట్రీని గమనించిన కన్నతల్లి ప్రియాంక అప్పటికే అక్కడి నుండి రహస్యంగా పరారైంది. ప్రస్తుతం పరారీలో ఉన్న నిందితురాలు ప్రియాంక కోసం పోలీసులు గాలింపు చర్యలు ముమ్మరం చేశారు.