హైదరాబాద్లోని మియాపూర్లో జరిగిన ఒక దారుణ హత్యోదంతం ఆలస్యంగా వెలుగులోకి వచ్చింది. వివాహేతర సంబంధానికి అడ్డుగా ఉన్నాడనే కారణంతో భర్తను చంపేసి, సాక్ష్యాలు దొరకకుండా మహారాష్ట్ర సరిహద్దుల్లో మృతదేహాన్ని పూడ్చిపెట్టిన భార్య సత్యవతిని పోలీసులు అరెస్టు చేశారు.
మియాపూర్కు చెందిన పెంటేశ్ (45) గతేడాది నవంబర్లో అదృశ్యమయ్యాడు. తన భర్త కనిపించడం లేదని సత్యవతి అప్పట్లో పోలీసులకు ఫిర్యాదు చేసింది. మియాపూర్ పోలీసులు కేసు నమోదు చేసి దర్యాప్తు చేపట్టారు. అయితే, భర్త అదృశ్యంపై భార్య సత్యవతి ఇచ్చిన సమాచారంపై అనుమానం రావడంతో పోలీసులు లోతుగా విచారణ మొదలుపెట్టారు.
పోలీసులు సత్యవతి కాల్ రికార్డులను పరిశీలించగా, ఆమెకు ఒక వ్యక్తితో అక్రమ సంబంధం ఉన్నట్లు గుర్తించారు. అలాగే సదరు వ్యక్తితో కలిసి ఆమె పక్కా ప్లాన్ ప్రకారం భర్తను హతమార్చినట్లు ఆధారాలు లభించాయి. సీసీ కెమెరాల ఫుటేజీలను కూడా క్షుణ్ణంగా విశ్లేషించగా.. హత్య తర్వాత మృతదేహాన్ని వాహనంలో తరలించిన దృశ్యాలు బయటపడ్డాయి. దీంతో విచారణలో సత్యవతి అసలు నిజం ఒప్పుకుంది. తన ప్రియుడితో కలిసి భర్తను చంపి, మృతదేహాన్ని మహారాష్ట్ర సరిహద్దు ప్రాంతంలో పూడ్చిపెట్టినట్లు ఆమె అంగీకరించింది.
సత్యవతి ఇచ్చిన సమాచారంతో పోలీసులు మహారాష్ట్ర సరిహద్దు ప్రాంతానికి చేరుకుని, అక్కడ పూడ్చిపెట్టిన పెంటేశ్ మృతదేహాన్ని వెలికితీశారు. పోస్టుమార్టం నిమిత్తం మృతదేహాన్ని ఆస్పత్రికి తరలించారు. ఈ హత్యలో ఆమెతో పాటు ఉన్న ప్రియుడిని కూడా పోలీసులు అదుపులోకి తీసుకున్నారు. భార్యే స్వయంగా భర్తను చంపి, పోలీసులను పక్కదోవ పట్టించడానికి గతేడాది ఫిర్యాదు చేయడం స్థానికంగా సంచలనం రేపింది. ఈ ఘటనపై మియాపూర్ పోలీసులు మరిన్ని వివరాలను సేకరిస్తున్నారు.