రాష్ట్రంలో కరోనా కేసులు మళ్లీ కలకలం రేపుతున్నాయి. వైఎస్సార్ కడప జిల్లాకు చెందిన ఇద్దరు వ్యక్తులు వైరస్ బారినపడి మృతి చెందారు. మరో నలుగురికి కోవిడ్ వైరస్ సోకినట్లు గుర్తించారు. ఆంధ్రప్రదేశ్లో నాలుగేళ్ల సుదీర్ఘ విరామం తర్వాత మళ్లీ కరోనా మరణాలు నమోదు కావడం రాష్ట్రవ్యాప్తంగా కలకలం రేపుతోంది. వైఎస్సార్ కడప జిల్లాలో కోవిడ్ బారినపడి ఇద్దరు వ్యక్తులు మృతి చెందగా, మరో నలుగురికి వైరస్ పాజిటివ్గా నిర్ధారణ అయింది. ఈ పరిణామంతో అప్రమత్తమైన జిల్లా వైద్య, ఆరోగ్య శాఖ వైరస్ వ్యాప్తిని అరికట్టేందుకు తక్షణ నివారణ చర్యలు చేపట్టింది.
వైరస్ వ్యాప్తిపై సోషల్ మీడియాలో జరుగుతున్న ప్రచారాల నేపథ్యంలో ఏపీ ప్రభుత్వ ఫ్యాక్ట్చెక్ విభాగం స్పందిస్తూ పూర్తి వివరాలను వెల్లడించింది. మరణించిన ఇద్దరూ కోవిడ్తో పాటు ఇతర తీవ్రమైన ఆరోగ్య సమస్యలతో బాధపడుతున్నట్లు అధికారులు స్పష్టం చేశారు.
ఎన్. సుబ్బరాయుడు (52): మధుమేహం, అధిక రక్తపోటుతో బాధపడుతూ జూన్ 28న చికిత్స పొందుతూ కన్నుమూశారు.సయ్యద్ మబాషా (43): దీర్ఘకాలిక మద్యపాన అలవాటుతో తీవ్ర అనారోగ్యానికి గురై, జూలై 7న మృతి చెందారు.
పాజిటివ్గా తేలిన మిగిలిన నలుగురిలో కడప ప్రభుత్వ వైద్య కళాశాలకు చెందిన ఓ ఇంటర్న్ వైద్య విద్యార్థి (25) కూడా ఉన్నారు. ప్రస్తుతం ఈ నలుగురిలో ముగ్గురు స్వల్ప లక్షణాలతో హోమ్ ఐసోలేషన్లో ఉండగా, క్షయ, మధుమేహం ఉన్న జి. కొండయ్య (67) అనే వృద్ధుడు కడప ప్రభుత్వ జనరల్ ఆస్పత్రిలో చికిత్స పొందుతున్నారు. వీరారెడ్డి (66) అనే మరో బాధితుడు కోలుకుని జూలై 4న డిశ్చార్జ్ అయ్యారు. వీరికి ఇటీవలి కాలంలో ఎలాంటి ప్రయాణ చరిత్ర లేకపోవడంతో, స్థానికంగానే వైరస్ వ్యాపించి ఉండవచ్చని అధికారులు భావిస్తున్నారు.
కరోనా ఆందోళనల నేపథ్యంలో కడప రిమ్స్ ఆస్పత్రిలో వెంటిలేటర్లు, హైఫ్లో ఆక్సిజన్ సదుపాయాలతో ప్రత్యేక ఐసోలేషన్ వార్డులను సిద్ధం చేశారు. ప్రభావిత ప్రాంతాల్లో ఆశా కార్యకర్తలు, ఏఎన్ఎంల ద్వారా ఇంటింటి జ్వర సర్వే (Fever Survey) నిర్వహిస్తున్నారు. ఫ్లూ మరియు తీవ్ర శ్వాసకోశ ఇబ్బందులు ఉన్నవారికి తక్షణమే ఆర్టీపీసీఆర్ పరీక్షలు చేస్తున్నారు.
వైద్య సిబ్బందికి పీపీఈ (PPE) కిట్లు తప్పనిసరి చేయడంతో పాటు, ఆస్పత్రి ప్రాంగణాలను శానిటైజ్ చేస్తున్నారు. కరోనా పరిస్థితి నియంత్రణలోనే ఉందని, ప్రజలు భయాందోళనలకు గురికావద్దని వైద్య ఆరోగ్య శాఖ కోరింది. సోషల్ మీడియాలో వచ్చే తప్పుడు ప్రచారాలను నమ్మవద్దని, కేవలం అధికారిక సమాచారాన్ని మాత్రమే విశ్వసించాలని విజ్ఞప్తి చేసింది.