వైఎస్సార్సీపీ అధినేత, మాజీ ముఖ్యమంత్రి వై.ఎస్. జగన్ మోహన్ రెడ్డి పులివెందుల పర్యటనలో భాగంగా భాకరాపురంలోని తన క్యాంపు కార్యాలయంలో విస్తృత ప్రజాదర్బార్ నిర్వహించారు. ఉదయం నుంచే వివిధ ప్రాంతాల నుంచి పెద్ద ఎత్తున ప్రజలు, అభ్యర్థులు, కార్యకర్తలు చేరగా, జగన్ ఒక్కొక్కరిని ఆప్యాయంగా పలకరించి, వారి సమస్యలు, కుటుంబ పరిస్థితులు, స్థానిక సమస్యలను శ్రద్ధగా వినిపించారు.
జనంతో మమేకమవుతూ, ఆయన “నేనున్నాను…మీ సమస్యలన్నీ నా సమస్యలే” అని హామీ ఇస్తూ వారికి ధైర్యం కల్పించారు. చాలా మంది తమకు ప్రభుత్వం నుంచి ఎలాంటి మద్దతు అందటం లేదని వేదన వ్యక్తం చేయగా, జగన్ వారి బాధలను ఓపికగా విని తక్షణ చర్యలు చేపట్టేలా సూచనలు జారీ చేశారు.
పలు గ్రామాల నుంచి వచ్చిన పెద్ద సంఖ్యలో ప్రజలు సంక్షేమ పథకాలలో అన్యాయం జరుగుతోందని, తాము ఎదుర్కొంటున్న ఇబ్బందులను ప్రభుత్వ యంత్రాంగం పట్టించుకోవడం లేదని ఆవేదన వ్యక్తం చేశారు. వారు చెప్పిన సమస్యలను పర్యవేక్షిస్తూ, తక్షణమే పరిష్కరించగల విషయాలపై జగన్ ప్రత్యక్షంగా స్పందించారు. ఇతర సమస్యలను కడప ఎంపీ వై.ఎస్. అవినాష్ రెడ్డి, స్థానిక నాయకులు, అధికారులతో చర్చించి వేగంగా పరిష్కరించేందుకు సూచించారు.
ప్రజాదర్బార్లో రైతుల సమస్యలు పెద్ద సంఖ్యలో వినిపించాయి. వరుసగా వచ్చిన తుఫానులు, అకాల వర్షాలతో పంటలు నష్టపోయినా, ప్రస్తుత రాష్ట్ర ప్రభుత్వం నుంచి ఎలాంటి సహాయం అందకపోవడంతో రైతులు తీవ్రంగా ఆందోళన వ్యక్తం చేశారు.మునుపటి వైఎస్సార్సీపీ ప్రభుత్వంలో మాకు ఆధారం ఉండేది, ఇప్పుడేమో వ్యవసాయం చేస్తామన్న భయమే కలుగుతోంది అని అన్నదాతలు వాపోయారు.
రైతుల బాధలను విన్న జగన్, వారి పక్షాన మాట్లాడతానని, వారి హక్కుల కోసం పోరాడతానని హామీ ఇచ్చారు. వ్యవసాయం బలపడేలా మద్దతు ఇచ్చే విధానాలు తిరిగి రావాలంటే ప్రజల గొంతును బలపరుస్తానని తెలిపారు.