ఆంధ్రప్రదేశ్ రాష్ట్రంలో ప్రభుత్వ శాఖల పనితీరుపై నిర్వహించిన సమీక్షా సమావేశంలో ఆసక్తికర పరిణామం చోటు చేసుకుంది. అమరావతిలో జరిగిన కలెక్టర్ల కాన్ఫెరెన్స్ సందర్భంగా వివిధ ప్రభుత్వ శాఖల పనితీరును విశ్లేషించిన ప్రభుత్వం, వాటికి ర్యాంకులను ప్రకటించింది. ఇందులో భాగంగా డిప్యూటీ సీఎం పవన్ కళ్యాణ్ పర్యవేక్షిస్తున్న అటవీ, పర్యావరణ శాఖ చివరి స్థానంలో నిలిచింది.
ఈ ర్యాంకులను A, B, C, D అనే నాలుగు విభాగాలుగా వర్గీకరించారు. ఈ సమీక్షలో బీసీ సంక్షేమ శాఖ అత్యుత్తమ ప్రదర్శన కనబరిచి అగ్రస్థానంలో నిలిచింది.
100కు 100 పాయింట్లు సాధించి ఈ శాఖ ప్రథమ స్థానాన్ని కైవసం చేసుకుంది. ప్రభుత్వ పథకాలను అమలు చేయడంలో, లక్ష్యాలను చేరుకోవడంలో ఈ శాఖ చూపిన చొరవను అధికారులు అభినందించారు.
రాష్ట్ర ఉపముఖ్యమంత్రి పవన్ కళ్యాణ్ పర్యవేక్షణలో ఉన్న అటవీ మరియు పర్యావరణ శాఖ ఈ జాబితాలో చిట్టచివరి స్థానానికి పరిమితమైంది. కేవలం 67 పాయింట్లతో ఈ శాఖ నివేదికలో వెనుకబడింది. నిర్ణీత లక్ష్యాలను చేరుకోవడంలో వైఫల్యం, క్షేత్రస్థాయిలో పనుల జాప్యం వంటి కారణాల వల్లే ఈ తక్కువ ర్యాంక్ వచ్చినట్లు తెలుస్తోంది. పవన్ కళ్యాణ్ వంటి కీలక నేత పర్యవేక్షిస్తున్న శాఖ వెనుకబడటం ఇప్పుడు రాజకీయంగా చర్చనీయాంశమైంది.
మొత్తం 18 శాఖలు 90 శాతం కంటే ఎక్కువ పాయింట్లు సాధించి ‘A’ గ్రేడ్లో నిలిచాయి.ప్రభుత్వ ప్రాధాన్యత పథకాలు, ప్రజల ఫిర్యాదుల పరిష్కారం వంటి అంశాల్లో ఈ 18 శాఖలు వేగంగా స్పందించినట్లు అధికారులు వెల్లడించారు. ప్రభుత్వ శాఖల మధ్య పోటీతత్వాన్ని పెంచడం మరియు పనితీరులో పారదర్శకత తీసుకురావడమే ఈ ర్యాంకుల ఉద్దేశ్యమని ప్రభుత్వం స్పష్టం చేసింది. తక్కువ ర్యాంకులు వచ్చిన శాఖలు తమ లోపాలను సరిదిద్దుకుని, వచ్చే త్రైమాసికం నాటికి మెరుగైన ఫలితాలు సాధించాలని ముఖ్యమంత్రి అధికారులకు దిశానిర్దేశం చేశారు.