ఆంధ్రప్రదేశ్లోని అనంతపురం జిల్లా సింగనమల నియోజకవర్గ తెలుగుదేశం పార్టీ లో అంతర్గత విభేదాలు భగ్గుమన్నాయి. స్థానిక టీడీపీ ఎమ్మెల్యే బండారు శ్రావణి శ్రీకర్ మరియు ఆమె కుటుంబ సభ్యుల తీరుపై సొంత పార్టీ కార్యకర్తలే బహిరంగంగా తిరుగుబాటుకు దిగడం ఇప్పుడు రాష్ట్ర రాజకీయాల్లో హాట్ టాపిక్గా మారింది.
కనంపల్లి ప్రసాద్ అనే టీడీపీ సీనియర్ కార్యకర్త సోషల్ మీడియా వేదికగా ఎమ్మెల్యేపై చేసిన వ్యాఖ్యలు, నిరసన వ్యక్తం చేసిన తీరు తీవ్ర సంచలనం సృష్టిస్తోంది. ఎమ్మెల్యే బండారు శ్రావణిని గెలిపించుకున్నందుకు తీవ్ర ఆవేదన వ్యక్తం చేస్తూ సదరు కార్యకర్త తన చెప్పుతో తానే కొట్టుకుని నిరసన తెలిపారు. టీడీపీ ఎమ్మెల్యే బండారు శ్రావణిని గెలిపించుకున్నందుకు మా చెప్పుతో మేము పదిసార్లు కొట్టుకున్నా కూడా మా పాపం ఊరికే పోదు అంటూ తీవ్ర భావోద్వేగానికి లోనయ్యారు. పార్టీ కోసం రాత్రింబవళ్లు కష్టపడితే, ఇప్పుడు తమపైనే పోలీసుల చేత కక్షసాధింపు చర్యలకు దిగుతున్నారని ఆరోపించారు.
స్థానిక నాయకత్వం పోలీసులను ఉపయోగించి సొంత పార్టీ కార్యకర్తలను వేధిస్తోందని ఆయన ఆవేదన వ్యక్తం చేశారు. పోలీసులతో మమ్మల్ని అరెస్టు చేయిస్తున్నారు.. మేమేమైనా నక్సలైట్లమా? ఉగ్రవాదులమా? రౌడీషీటర్లమా? రేపిస్టులమా? అంటూ నిలదీశారు. నియోజకవర్గంలో కార్యకర్తలకు రక్షణ లేకుండా పోయిందని, ప్రజాస్వామ్యబద్ధంగా ప్రశ్నిస్తే అరెస్టులు చేయిస్తున్నారని మండిపడ్డారు.
ఎమ్మెల్యే బండారు శ్రావణి కేవలం స్వార్థ ప్రయోజనాల కోసమే చూస్తున్నారని సదరు కార్యకర్త ఆరోపించారు. అంతేకాకుండా, ఎమ్మెల్యే తల్లి లీలావతి నియోజకవర్గంలో విపరీతమైన అవినీతికి పాల్పడుతున్నారని ప్రత్యక్షంగా విమర్శలు గుప్పించారు. ఎమ్మెల్యే స్వార్థపరురాలు.. ఎమ్మెల్యే తల్లి లీలావతి అవినీతిపరులు అని తీవ్ర వ్యాఖ్యలు చేశారు.
సింగనమల నియోజకవర్గంలో గత కొంతకాలంగా ఎమ్మెల్యే వర్గానికి, స్థానిక పాత కాపులకు (కార్యకర్తలకు) మధ్య విభేదాలు నడుస్తున్నట్లు సమాచారం. అయితే ఈ స్థాయిలో ఒక సొంత పార్టీ కార్యకర్త రోడ్డెక్కి చెప్పుతో కొట్టుకుంటూ ఎమ్మెల్యేపై అవినీతి, కక్షసాధింపు ఆరోపణలు చేయడం టీడీపీ అధిష్ఠానానికి పెద్ద తలనొప్పిగా మారింది.