ఇరాన్ కీలక నిర్ణయంపై ఆలోచిస్తోంది. ప్రపంచానికి అత్యంత ముఖ్యమైన సముద్ర మార్గాల్లో ఒకటైన హార్మూజ్ జలసంధి గుండా ప్రయాణించే నౌకలపై టోల్ ఫీజులు విధించే ప్రతిపాదనను పరిశీలిస్తోంది.
ఈ జలసంధి ద్వారా ప్రపంచ చమురు, ద్రవీకృత సహజ వాయువు (LNG) సరఫరాలో దాదాపు ఐదో వంతు రవాణా జరుగుతుంది. ఇటీవలి కాలంలో Iranపై United States, Israelలతో జరుగుతున్న యుద్ధ పరిస్థితుల నేపథ్యంలో, ఈ మార్గంపై తన ప్రభావాన్ని పెంచుకున్న ఇరాన్ ఇప్పుడు దానిని ఆదాయ వనరుగా మార్చుకునే ప్రయత్నంలో ఉంది.
ఇరాన్ పార్లమెంట్లో ప్రవేశపెట్టబోయే బిల్లులో భాగంగా, ఈ జలసంధి ద్వారా రవాణా చేసే దేశాలు—ప్రత్యేకంగా చమురు, ఆహార సరఫరా, ఇతర వాణిజ్య సరుకులు తరలించే నౌకలు—టోల్, పన్నులు చెల్లించాల్సి ఉంటుందని సమాచారం. ఇరాన్ సుప్రీం లీడర్కు సలహాదారు కూడా యుద్ధం అనంతరం “హోర్ముజ్ జలసంధికి కొత్త విధానం” అమలు చేస్తామని వెల్లడించారు.
ఫిబ్రవరి చివరి నుండి ఈ ప్రాంతంలో ఉద్రిక్తతలు పెరిగాయి. కనీసం 20కు పైగా వాణిజ్య నౌకలపై డ్రోన్లు, క్షిపణులతో దాడులు జరిగాయి. కొన్ని నౌకలు అగ్నికి ఆహుతయ్యాయి, మరికొన్ని ప్రయాణాన్ని మధ్యలోనే నిలిపివేయాల్సి వచ్చింది. ఈ పరిస్థితుల వల్ల ఈ మార్గంలో రవాణా గణనీయంగా తగ్గిపోయింది.
ఈ జలసంధి వెడల్పు కేవలం 33 కిలోమీటర్లే ఉండటంతో, ఇక్కడ జరిగే అంతరాయాలు ప్రపంచ ఇంధన మార్కెట్లపై పెద్ద ప్రభావం చూపుతున్నాయి. ముఖ్యంగా సౌదీ అరేబియా, ఇరాక్, యూఏఈ, కువైట్ వంటి దేశాలు ఈ మార్గంపై అధికంగా ఆధారపడి ఉన్నాయి. వీటి నుంచి వచ్చే ఎగుమతుల్లో దాదాపు 80 శాతం ఆసియా దేశాలకు వెళ్తాయి.
ప్రస్తుతం కొన్ని దేశాలకు, ముఖ్యంగా చైనా, భారత్కు వెళ్లే చమురు రవాణాను అనుమతిస్తూ, పాశ్చాత్య దేశాలకు సంబంధించిన నౌకలను పరిమితం చేస్తూ ఇరాన్ ఈ మార్గాన్ని నియంత్రిత కారిడార్గా మార్చినట్లు తెలుస్తోంది. ఈ పరిణామాలు ప్రపంచ వాణిజ్య, ఇంధన రంగాలపై మరింత ప్రభావం చూపే అవకాశముంది.