డీఎస్సీ అక్రమాలపై వైసీపీ పోరుబాట

ఉపాధ్యాయ పోస్టుల భర్తీ కోసం నిర్వహించిన డీఎస్సీ (DSC) పరీక్షలు, ఫలితాల సరళిలో భారీగా అక్రమాలు జరిగాయంటూ వైఎస్సార్ కాంగ్రెస్ పార్టీ ఏపీ వ్యాప్తంగా ఆందోళనలకు దిగింది. నిరుద్యోగులకు, అభ్యర్థులకు అన్యాయం జరిగిందని ఆరోపిస్తూ వైసిపి అధినాయకత్వం పిలుపు మేరకు రాష్ట్రంలోని అన్ని జిల్లాల కేంద్రాల్లో ఆ పార్టీ నాయకులు, కార్యకర్తలు, అనుబంధ విభాగాలు మరియు నిరుద్యోగ జేఏసీ ప్రతినిధులు శనివారం భారీ ఎత్తున నిరసన కార్యక్రమాలు చేపట్టారు.

రాష్ట్రంలోని అన్ని జిల్లా కలెక్టరేట్ల వద్ద వైసిపి శ్రేణులు భారీ ధర్నాలు నిర్వహించాయి. ప్లకార్డులు పట్టుకుని ప్రభుత్వానికి వ్యతిరేకంగా నినాదాలు చేశారు. డీఎస్సీ ఫలితాల వెల్లడిలో, నార్మలైజేషన్ ప్రక్రియలో తీవ్ర అక్రమాలు జరిగాయని, దీనివల్ల మెరిట్ అభ్యర్థులు నష్టపోయారని నేతలు ఆరోపించారు. డీఎస్సీ ప్రక్రియలో పారదర్శకత లోపించిందని, అర్హులైన అభ్యర్థులకు తీవ్ర అన్యాయం జరిగిందని నిరసనకారులు మండిపడ్డారు.

ఈ అక్రమాలపై తక్షణమే విచారణ జరిపించాలని, నష్టపోయిన అభ్యర్థులకు న్యాయం చేయాలని డిమాండ్ చేస్తూ జిల్లా కలెక్టర్లకు, విద్యాశాఖ అధికారులకు వైసీపీ నేతలు మెమొరాండం సమర్పించారు. కూటమి ప్రభుత్వం నిరుద్యోగుల జీవితాలతో చెలగాటమాడుతోందని తీవ్రస్థాయిలో ధ్వజమెత్తారు. ఎంతో కాలంగా నోటిఫికేషన్ కోసం ఎదురుచూసి, రాత్రింబగళ్లు కష్టపడి చదివిన అభ్యర్థులను ఈ అక్రమ విధానాల ద్వారా మానసిక క్షోభకు గురిచేశారని విమర్శించారు.

()డీఎస్సీ నియామక ప్రక్రియలో జరిగిన అవకతవకలపై తక్షణమే ఉన్నత స్థాయి కమిటీతో సమగ్ర విచారణ జరిపించాలి.

()మార్కుల కేటాయింపు మరియు ఫలితాల జాబితాను పూర్తిగా పారదర్శకంగా రీ-వెరిఫికేషన్ చేయాలి.

()నష్టపోయిన ప్రతి నిరుద్యోగ అభ్యర్థికి ప్రభుత్వం తగిన న్యాయం చేయాలి, లేనిపక్షంలో ఆందోళనలను మరింత ఉధృతం చేస్తాం అని ఈ సందర్భంగా వైసీపీ నేతలు హెచ్చరించారు.