పంజాబ్ రాష్ట్రంలో ఒక ప్రైవేట్ కార్యాలయంలో అందరూ చూస్తుండగానే ఘోరం చోటుచేసుకుంది. ఒక ప్రేమోన్మాది తన మాజీ ప్రియురాలిని తోటి ఉద్యోగుల ముందే కత్తితో విచక్షణారహితంగా పొడిచి చంపేశాడు. ఆపై అదే కత్తితో తను కూడా పొడుచుకుని ఆత్మహత్యకు యత్నించాడు. గురువారం సాయంత్రం మొహాలీలోని ఒక ప్రైవేటు సంస్థలో జరిగిన ఈ భయంకరమైన హత్య ఉదంతం స్థానికంగా తీవ్ర కలకలం రేపింది.
పోలీసులు తెలిపిన వివరాల ప్రకారం.. పటియాలాకు చెందిన డింపుల్ (30) అనే మహిళ మొహాలీలోని ఒక ప్రైవేటు కంపెనీలో పనిచేస్తోంది. అదే ఆఫీసులో పనిచేసే ఆమె సహోద్యోగి హర్జిందర్ సింగ్ మాన్ (39)తో గత మూడేళ్లుగా ఆమె ప్రేమలో ఉంది. అయితే వీరిద్దరి మధ్య కొన్ని మనస్పర్థలు రావడంతో ఇటీవలే వీరు విడిపోయారు. బ్రేకప్ తర్వాత డింపుల్తో మళ్లీ కలిసేందుకు హర్జిందర్ అనేకసార్లు ప్రయత్నించినప్పటికీ ఆమె తీవ్రంగా నిరాకరించింది. దాంతో అతను ఆమెపై పగ పెంచుకున్నాడు.
ఈ క్రమంలోనే గురువారం సాయంత్రం తీవ్ర ఆవేశంతో ఆఫీసు లోపలికి వచ్చిన హర్జిందర్, నేరుగా డింపుల్ సీటు వద్దకు వెళ్లి కత్తితో దాడి చేశాడు. ఆమె భయంతో ప్రాణాలు కాపాడుకోవడానికి ఆఫీసు అంతా పరుగెత్తినప్పటికీ, అతడు వెంబడించి దాదాపు 20 సార్లు కత్తితో నరికి దారుణంగా హతమార్చాడు. అక్కడ ఉన్న తోటి ఉద్యోగులు భయంతో కేకలు వేస్తూ అతడిని ఆపడానికి ప్రయత్నించినప్పటికీ ఫలితం లేకుండా పోయింది. డింపుల్ చనిపోయిందని నిర్ధారించుకున్నాక, నిందితుడు అదే కత్తితో తనను తాను పొడుచుకున్నాడు.
ఈ భయంకరమైన దృశ్యాలన్నీ ఆఫీసులోని సీసీటీవీ (CCTV) కెమెరాలో రికార్డయ్యాయి. సమాచారం అందుకున్న పోలీసులు హుటాహుటిన ఘటనా స్థలానికి చేరుకుని ఇద్దరినీ ఆసుపత్రికి తరలించారు. అయితే అప్పటికే డింపుల్ మరణించగా, తీవ్ర గాయాలైన హర్జిందర్ పరిస్థితి ప్రస్తుతం అత్యంత విషమంగా ఉందని వైద్యులు తెలిపారు. ఆఫీసులోనే జరిగిన ఈ దారుణ హత్యపై మొహాలీ పోలీసులు కేసు నమోదు చేసుకుని లోతుగా దర్యాప్తు జరుపుతున్నారు.