నీట్ పేపర్ లీకేజీ వివాదంపై విద్యార్థుల నిరసనలకు మద్దతు తెలిపిన బాలీవుడ్ స్టార్ హీరో సల్మాన్ ఖాన్, తనను ట్రోల్ చేస్తున్న వారికి తనదైన శైలిలో గట్టి సమాధానమిచ్చారు. తాను భయపడి వెనక్కి తగ్గానంటూ సోషల్ మీడియాలో వస్తున్న వదంతులకు ఆయన ఒకే ఒక్క క్యాప్షన్తో చెక్ పెట్టారు.
నీట్ పేపర్ లీక్ వివాదంపై సల్మాన్ ఖాన్ వరుసగా రెండు రోజులు పోస్టులు పెట్టిన సంగతి తెలిసిందే. మొదట విద్యార్థులకు మద్దతుగా స్పందిస్తూ.. మెరుగైన విద్యావ్యవస్థను కోరుతూ విద్యార్థులు, తల్లిదండ్రులు ఒక్కటై పోరాడడం అభినందనీయమని, ఈ ఆందోళనల్లో విద్యార్థులకు దెబ్బలు తగలడం తనను తీవ్రంగా బాధించిందని పేర్కొన్నారు. ఆ మరుసటి రోజు మరో పోస్ట్ పెడుతూ.. విద్యార్థులు సురక్షితంగా ఇళ్లకు వెళ్లాలని, ఎవరూ ఆందోళన చెందవద్దని సూచించారు. ఇదే సమయంలో సోనమ్ వాంగ్ చుక్ కూడా తన దీక్షను విరమించాలని కోరారు.
అయితే ఈ పోస్టుల తర్వాత సల్మాన్ ఖాన్ భయపడ్డారంటూ సోషల్ మీడియాలో కొన్ని ట్రోల్స్ వచ్చాయి. అంతేకాకుండా, గతంలో ఆయన తండ్రితో కలిసి చేసిన ఓ పాత వీడియోను వైరల్ చేస్తూ కొందరు విమర్శలు గుప్పించారు. ఈ పరిణామాలపై స్పందిస్తూ సల్మాన్ ఖాన్ తాజాగా తన జిమ్ ఫొటోను షేర్ చేశారు. ‘‘సల్మాన్ ఖాన్ భయపడ్డాడా?.. అస్సలు కాదు. భయపడేవారు చనిపోయినట్లే’’ అంటూ ఆయన రాసుకొచ్చిన క్యాప్షన్ ప్రస్తుతం నెట్టింట వైరల్గా మారింది. ఈ ఒక్క పోస్ట్తో ఆయన తనపై వస్తున్న ట్రోల్స్కు చెక్ పెట్టారు.
కాగా, నీట్ పేపర్ లీక్ అంశంపై సమగ్ర విచారణ జరిపి అర్హులైన విద్యార్థులకు పూర్తి న్యాయం చేయాలని సల్మాన్ ఖాన్తో పాటు హృతిక్ రోషన్, అలియా భట్, రాజ్కుమార్ రావు తదితర బాలీవుడ్ ప్రముఖులు ఇప్పటికే డిమాండ్ చేశారు. తాజాగా నటి జ్యోతిక, ప్రముఖ దర్శకుడు శేఖర్ కమ్ముల కూడా స్పందిస్తూ.. జెన్-జీ విద్యార్థుల డిమాండ్లు ఎంతో అర్థవంతంగా ఉన్నాయని, వారి శాంతియుత ఉద్యమం అందరికీ స్ఫూర్తిమంతమని కొనియాడారు.