నటుడు నాగచైతన్యతో రిలేషన్షిప్, ఆపై వివాహం కారణంగా గత కొన్ని సంవత్సరాలుగా నటి శోభితా ధూళిపాళ్ల నిరంతరం వార్తల్లో నిలుస్తూ పబ్లిక్ అటెన్షన్ మధ్యే ఉంటోంది. వీరిద్దరూ 2024 ఆగస్టులో నిశ్చితార్థం చేసుకుని, అదే ఏడాది డిసెంబరులో వివాహ బంధంతో ఒకటయ్యారు. వీరి పెళ్లి అప్పట్లో సౌత్ ఇండియాలోనే మోస్ట్ టాక్డ్ సెలబ్రిటీ ఈవెంట్గా నిలిచింది. అయితే, తమ వ్యక్తిగత జీవితంపై నెట్టింట వచ్చే రకరకాల అభిప్రాయాలు, నిరంతర నిఘా (Public Scrutiny) ను ఎలా ఎదుర్కొంటుందో శోభితా తాజాగా ఓ ఇంటర్వ్యూలో పంచుకుంటూ ఆసక్తికర వ్యాఖ్యలు చేసింది.
ఈ విధమైన పబ్లిక్ అటెన్షన్ తనను మరింత ఆత్మవిశ్వాసంతో ఉండేలా చేసిందని, ప్రజలు చూపించేది కేవలం సహజమైన ఉత్సుకత (Natural Curiosity) మాత్రమేనని శోభితా పేర్కొంది. తాను కేవలం తన జీవితాన్ని ప్రశాంతంగా గడుపుతున్నానని, సోషల్ మీడియాలో జరిగే ప్రతి చర్చకు స్పందించాల్సిన అవసరం తనకు లేదని స్పష్టం చేసింది. కాలక్రమేణా తనకు తానుగా ఎంతో కంఫర్టబుల్గా మారిపోయానని, నెట్టింట వచ్చే భిన్నమైన అభిప్రాయాలు తనను ఏమాత్రం ప్రభావితం చేయలేవని వెల్లడించింది.
సోషల్ మీడియాలో వచ్చే విమర్శలు, హంగామాను ఆమె మారుతున్న వాతావరణ పరిస్థితులతో పోల్చింది. “సమాజానికి కూడా వాతావరణం లాంటి కొన్ని ప్రత్యేక ప్యాటర్న్స్ ఉంటాయి. వాతావరణం ఎలాగైతే ఎప్పుడూ ఒకేలా ఉండకుండా నిరంతరం మారుతుంటుందో, అలాగే ప్రజల అభిప్రాయాలు, చర్చలు కూడా మారుతూ ఉంటాయి, కాబట్టి వీటిని అంత సీరియస్గా తీసుకోకూడదు.” అని చెప్పుకొచ్చింది. అందుకే ఈ ట్రోల్స్ లేదా ప్రశంసల వెల్లువకు కొట్టుకుపోకుండా మనసుకు నచ్చిన వ్యక్తిగత ఆనందంపై దృష్టి పెట్టడం ముఖ్యమని శోభితా అభిప్రాయపడింది.