SIR..ఎలాంటి అడ్డంకులు వద్దు:సుప్రీం సంచలనం

పశ్చిమ బెంగాల్ ప్రత్యేక దర్యాప్తు నివేదిక (SIR)పై జరిగిన విచారణ సందర్భంగా సుప్రీంకోర్టు చీఫ్ జస్టిస్ సూర్య కాంత్ కీలక వ్యాఖ్యలు చేశారు. SIR ప్రక్రియకు ఎలాంటి అడ్డంకులను సుప్రీంకోర్టు అనుమతించదని స్పష్టం చేశారు. అవసరమైన చోట్ల మెరుగుదలల కోసం ఆదేశాలు ఇస్తామని, కానీ ప్రక్రియకు అడ్డుపడే ప్రయత్నాలను మాత్రం సహించబోమని ఆయన హెచ్చరించారు.

ఇది అన్ని రాష్ట్రాలు అర్థం చేసుకోవాలి అని CJI వ్యాఖ్యానించారు. ఫిబ్రవరి 5 నాటికి అధికారుల జాబితా సమర్పించి ఉంటే, ఇప్పటికే భారత ఎన్నికల సంఘం (ECI) నిర్ణయం తీసుకునేదని కూడా ఆయన గమనించారు. సీనియర్ న్యాయవాది అభిషేక్ మను సింఘ్వి, అధికారుల పేర్లు ఇవ్వాలని ఎన్నికల సంఘం రాష్ట్రాన్ని ఎప్పుడూ కోరలేదని వాదించారు. దీనికి ప్రతిగా సీనియర్ న్యాయవాది శ్యామ్ దివాన్, ఇప్పుడు 8,500 మంది అధికారుల జాబితాను సమర్పించామని, దాన్ని స్వీకరించాలని కోర్టును కోరారు.

దీనిపై CJI వెంటనే స్పందిస్తూ, ఆ జాబితాలో అధికారుల పేర్లు, హోదాలు, పోస్టింగ్ ప్రాంతాలు ఉన్నాయా? వారు సంబంధిత ఎలక్టోరల్ రిజిస్ట్రేషన్ ఆఫీసర్లకు (EROలు) మరుసటి రోజే రిపోర్ట్ చేయగలరా? అని ప్రశ్నించారు. దివాన్ దీనికి అవునని సమాధానమిచ్చారు.

అయితే, ఎన్నికల సంఘం తరఫున హాజరైన సీనియర్ న్యాయవాది డి.ఎస్. నాయుడు, తమకు అధికారుల పేర్లు అందలేదని స్పష్టం చేశారు. శనివారం మధ్యాహ్నం 12:30కి వచ్చిన పత్రాల్లో అలాంటి వివరాలు లేవని చెప్పారు. జిల్లా వారీగా సమాచారం ఇచ్చామని దివాన్ చెప్పగా, నాయుడు దాన్ని ఖండించారు. వాస్తవాలపై వివాదాలు కొనసాగితే, చీఫ్ సెక్రటరీని కోర్టుకు పిలవాల్సి వస్తుందని CJI హెచ్చరించారు.

అధికారుల పేర్లు సిద్ధంగా ఉన్నాయని, వారంతా గ్రూప్-బీ అధికారులు అని దివాన్ తెలిపారు. అయితే ఫిబ్రవరి 4 లేదా 5కే ఈ వివరాలు ఇవ్వొచ్చని CJI వ్యాఖ్యానించారు. రాష్ట్రం కొంత సమయం తీసుకుందని దివాన్ సమాధానమిచ్చారు.రాష్ట్రం సహకరించడంలేదన్న భావన కల్పిస్తున్నారని సింఘ్వి వాదించారు. మైక్రో ఆబ్జర్వర్లు వేరే కేటగిరీకి చెందినవారని, చాలామంది పీఎస్‌యూల్లో పనిచేసేవారని చెప్పారు.

మ్యాప్ అయిన, మ్యాప్ కాని ఓటర్లపై CJI ప్రశ్నలు వేశారు. తార్కిక లోపాల (Logical Discrepancy) కేటగిరీలో ఉన్న కేసుల్లో 50 శాతం పైగా చిన్న స్పెల్లింగ్ తప్పుల వల్లేనని దివాన్ తెలిపారు. కేవలం స్పెల్లింగ్ తప్పుల వల్లే సుమారు 70 లక్షల మంది ఓటర్లు ఆ కేటగిరీలో పడ్డారా? అని CJI ప్రశ్నించారు. విచారణ సమయంలో పలువురు ఒకేసారి మాట్లాడటంపై CJI అసంతృప్తి వ్యక్తం చేశారు.ఇది కోర్టు నంబర్-1, మార్కెట్ కాదు అంటూ క్రమశిక్షణ పాటించాలని సూచించారు.

మొత్తం ప్రక్రియ ఫిబ్రవరి 14 నాటికి పూర్తవుతుందని దివాన్ కోర్టుకు తెలిపారు.