బీఆర్ఎస్ పార్టీకి చెందిన ఫిరాయింపు ఎమ్మెల్యేల వ్యవహారంలో తెలంగాణ స్పీకర్ గడ్డం ప్రసాద్ కుమార్కు సుప్రీంకోర్టు నోటీసులు జారీ చేసింది. ఈ కేసులో స్పీకర్ కోర్టు ఆదేశాలను ఉల్లంఘించారని ఆరోపిస్తూ బీజేపీ ఎమ్మెల్యే ఏలేటి మహేశ్వర్ రెడ్డి సుప్రీంకోర్టును ఆశ్రయించారు. ఫిరాయింపు ఎమ్మెల్యేలకు స్పీకర్ క్లీన్ చిట్ ఇవ్వడాన్ని ఆయన సవాల్ చేశారు.
ఈ పిటిషన్పై విచారణ చేపట్టిన సుప్రీంకోర్టు, ఇదే అంశంపై బీఆర్ఎస్ వర్కింగ్ ప్రెసిడెంట్ కేటీఆర్ ఇప్పటికే దాఖలు చేసిన ప్రధాన పిటిషన్తో మహేశ్వర్ రెడ్డి పిటిషన్ను జత చేయాలని ఆదేశించింది. ఈ మేరకు జస్టిస్ సంజయ్ కరోల్, జస్టిస్ అగస్టిన్ జార్జ్లతో కూడిన ధర్మాసనం కీలక ఆదేశాలు జారీ చేసింది.
ఫిరాయింపు ఎమ్మెల్యేలపై నిర్ణయం తీసుకోవడంలో స్పీకర్ జాప్యం చేశారని, అంతేకాకుండా సుప్రీంకోర్టు మార్గదర్శకాలను పాటించలేదని పిటిషనర్లు వాదించారు. ప్రజాస్వామ్య వ్యవస్థకు ఇది తీవ్రంగా హానికరమని వారు కోర్టు దృష్టికి తీసుకెళ్లారు.
వాదనలు విన్న అనంతరం, ఈ కేసు తదుపరి విచారణను ఫిబ్రవరి 6వ తేదీకి వాయిదా వేస్తున్నట్లు సుప్రీంకోర్టు ప్రకటించింది. ఈ కేసు రాజకీయంగా ప్రాధాన్యత సంతరించుకోవడంతో పాటు, తెలంగాణ రాజకీయాల్లో కీలక మలుపు తిప్పే అవకాశాలు ఉన్నాయని రాజకీయ వర్గాలు చర్చిస్తున్నాయి.