దేశంలో కమర్షియల్ గ్యాస్ సిలిండర్ల సరఫరాపై పెట్రోలియం కంపెనీలు కీలక నిర్ణయం తీసుకున్నాయి. దేశవ్యాప్తంగా కమర్షియల్ ఎల్పీజీ వినియోగాన్ని నియంత్రించేందుకు ఈ నిర్ణయం తీసుకున్నట్లు అధికారులు తెలిపారు. తాజా ఆదేశాల ప్రకారం హోటళ్లకు కమర్షియల్ గ్యాస్ సిలిండర్ల సరఫరాను తాత్కాలికంగా నిలిపివేయాలని గ్యాస్ డీలర్లకు సూచించారు.
అయితే అత్యవసర సేవలకు మాత్రం సిలిండర్ల సరఫరా కొనసాగుతుందని స్పష్టం చేశారు. ముఖ్యంగా ఆసుపత్రులు, హాస్టల్స్ వంటి అవసరమైన సంస్థలకు మాత్రమే కమర్షియల్ గ్యాస్ సిలిండర్లు అందించాలని పెట్రోలియం కంపెనీలు ఆదేశాలు జారీ చేశాయి. ప్రజలకు అవసరమైన సేవలు అంతరాయం కలగకుండా ఈ నిర్ణయం తీసుకున్నట్లు తెలుస్తోంది.
ఇక గృహ వినియోగదారుల విషయంలో కూడా కొత్త మార్గదర్శకాలు జారీ చేశారు. గ్యాస్ కనెక్షన్ ఉన్న ప్రతి వినియోగదారుడు తప్పనిసరిగా ఈ-కేవైసీ ప్రక్రియను పూర్తి చేయాలని సూచించారు. వినియోగదారుల వివరాలను ధృవీకరించడానికి మరియు అక్రమ వినియోగాన్ని అరికట్టడానికి ఈ-కేవైసీ తప్పనిసరి చేసినట్లు అధికారులు తెలిపారు.
ఈ-కేవైసీ చేయని గృహ వినియోగదారులకు గ్యాస్ బుకింగ్ సేవలను తాత్కాలికంగా నిలిపివేయనున్నట్లు హెచ్చరించారు. కాబట్టి వినియోగదారులు త్వరగా ఈ-కేవైసీ పూర్తి చేసుకోవాలని సూచించారు. ఈ ప్రక్రియను గ్యాస్ ఏజెన్సీలు లేదా ఆన్లైన్ ద్వారా సులభంగా పూర్తి చేసుకోవచ్చని అధికారులు తెలిపారు. ఈ నిర్ణయం వల్ల గ్యాస్ సరఫరా వ్యవస్థను క్రమబద్ధీకరించడం, అక్రమ వినియోగాన్ని నియంత్రించడం సాధ్యమవుతుందని పెట్రోలియం కంపెనీలు భావిస్తున్నాయి.