నష్టాల్లో కూరుకుపోయిన ఓ సంస్థకు రుణం అందించటంలో అధ్యక్షుడు డొనాల్డ్ ట్రంప్ అల్లుడు జేరడ్ కుష్నర్ పాత్ర ఉండే అవకాశం ఉందని పేర్కొంది మహమ్మారి సహాయ నిధి పర్యవేక్షణ కమిటీ. సదరు సంస్థకు సుమారు 700 మిలియన్ డాలర్ల విపత్తు సహాయ రుణం అందినట్లు తెలిపింది. ఆ సంస్థ నష్టాలతో సతమతమవుతున్న కారణంగా ప్రజల సొమ్ము నష్టపోయే ప్రమాదం ఉందని ఆందోళన వ్యక్తం చేసింది.
గురువారం జరిగిన విచారణంలో భాగంగా..’వైఆర్సీ వరల్డ్వైడ్’ అనే సంస్థకు రుణం మంజూరు చేస్తూ ట్రెజరీ విభాగం తీసుకున్న నిర్ణయాన్ని ప్యానల్ ప్రశ్నించింది. నలుగురు సభ్యుల కాంగ్రెస్ నిఘా కమిషన్లో ఒకరైన భరత్ రామమూర్తి ఈ మేరకు కుష్నర్ పాత్రను ప్రస్తావించారు.
జాతీయ భద్రతకు వైఆర్సీ వ్యాపారం కీలకమంటూ రుణం ఇవ్వటాన్ని ప్యానల్ సభ్యులు ప్రశ్నించారు. ట్రెజరీ విభాగం కార్పొరేట్ సహాయ కార్యక్రమంలో భాగంగా జాతీయ భద్రతను పరిగణనలోకి తీసుకుని ఇంత భారీ మొత్తంలో రుణాలు ఇవ్వటం ఇదే తొలిసారి కావటం అనుమానాలకు తావిస్తోంది.