హిందూపురంలో జరుగుతున్న ఉద్రిక్త పరిస్థితులపై ఎమ్మెల్యే బాలకృష్ణ ఎక్కడ ఉన్నారు? ఎందుకు స్పందించడం లేదు? అంటూ వైసీపీ నాయకురాలు, ఆ పార్టీ అధికార ప్రతినిధి శ్యామల తీవ్ర స్థాయిలో ప్రశ్నలు లేవనెత్తారు. నగరంలో శాంతిభద్రతలకు భంగం కలిగించే విధంగా రచ్చ జరుగుతుండగా, ప్రజాప్రతినిధి అయిన బాలకృష్ణ కనీసం స్పందన చూపకపోవడం ఆశ్చర్యకరమని ఆమె విమర్శించారు.
శ్యామల మాట్లాడుతూ, “వైసీపీ కార్యాలయంపై దాడి జరిగితే బాలకృష్ణ ఏమైపోయారు? ఎందుకు ఒక్క మాట కూడా మాట్లాడలేదు?” అని ప్రశ్నించారు. ప్రజలు ఎన్నుకున్న నాయకుడిగా బాధ్యతలు నిర్వర్తించడం చాలా ముఖ్యమని, సినిమాలపైన ప్రేమ ఉన్నా, తన నియోజకవర్గ సమస్యలను పట్టించుకోవడం కూడా ఆయన కర్తవ్యమని గుర్తుచేశారు.
బాలకృష్ణకు అత్యంత సన్నిహితుడైన పీఏ ఒత్తిడితోనే పోలీసులపై రాజకీయ ప్రభావం చూపించి, వైసీపీ నాయకులపై అక్రమ కేసులు బలవంతంగా పెట్టిస్తున్నారని పేర్కొన్నారు. రాజకీయ ప్రతీకార చర్యలు ప్రజాస్వామ్యానికి విరుద్ధమని ఆమె వ్యాఖ్యానించారు.
హిందూపురం ప్రజలు భయాందోళనల్లో ఉన్న ఈ పరిస్థితుల్లో, ఎమ్మెల్యే బాలకృష్ణ ముందుకు వచ్చి సమస్యలను అర్థం చేసుకుని చర్యలు తీసుకోవాల్సిన బాధ్యత ఉందని శ్యామల హితవు పలికారు.