లోక్సభలో మహిళా రిజర్వేషన్లకు తమ పార్టీ వ్యతిరేకం కాదని, అయితే కేంద్ర ప్రభుత్వం కేవలం రాజకీయ ప్రయోజనాల కోసమే ఈ బిల్లును ఇప్పుడు ముందుకు తెస్తోందని కాంగ్రెస్ జాతీయ అధ్యక్షుడు మల్లికార్జున ఖర్గే ఆరోపించారు. సోమవారం బెంగళూరులో విలేకరులతో మాట్లాడిన ఆయన, పార్లమెంటు ప్రత్యేక సమావేశాలకు ముందు కేంద్రం తీరుపై తీవ్ర విమర్శలు గుప్పించారు.
మేము నారీ శక్తి బిల్లుకు వ్యతిరేకం కాదు. నిజానికి మా హయాంలోనే ఈ ప్రతిపాదనను మొదట తెచ్చాం. కానీ ఇప్పుడు ప్రభుత్వం రాజకీయ లబ్ధి కోసమే దీనిపై హడావిడి చేస్తోంది” అని ఖర్గే పేర్కొన్నారు.
ఈ అంశంపై తదుపరి కార్యాచరణను నిర్ణయించేందుకు ఏప్రిల్ 15న సర్వపక్ష సమావేశాన్ని ఏర్పాటు చేసినట్లు ఆయన వెల్లడించారు. ఆ సమావేశంలో చర్చించి తమ తుది నిర్ణయాన్ని ప్రకటిస్తామన్నారు.
మహిళా రిజర్వేషన్ల అమలు (నారీ శక్తి వందన్ అధినియం) మరియు నియోజకవర్గాల పునర్విభజన బిల్లుపై చర్చించేందుకు ఏప్రిల్ 16 నుండి మూడు రోజుల పాటు పార్లమెంటు ప్రత్యేకంగా సమావేశం కానుంది.
నియోజకవర్గాల పునర్విభజన ప్రక్రియ అమల్లోకి వస్తే, లోక్సభ సీట్ల సంఖ్య ప్రస్తుతమున్న 543 నుండి 816కి పెరిగే అవకాశం ఉంది.2011 జనాభా గణన డేటా ఆధారంగా మూడో వంతు మహిళా రిజర్వేషన్లను అమలు చేయాలని కేంద్రం యోచిస్తోంది. 2029 నాటికి దీన్ని పూర్తి చేయాలని లక్ష్యంగా పెట్టుకుంది.ఈ బిల్లులో ఎస్సీ, ఎస్టీ రిజర్వేషన్లు యథాతథంగా కొనసాగుతాయి. అయితే, ఓబీసీ రిజర్వేషన్లకు సంబంధించి ఎటువంటి ప్రత్యేక నిబంధన లేకపోవడంపై విపక్షాలు గతంలోనే అభ్యంతరాలు వ్యక్తం చేశాయి.
ప్రధాని మోదీ ఈ బిల్లును 21వ శతాబ్దపు అతిపెద్ద నిర్ణయాలలో ఒకటిగా అభివర్ణిస్తుండగా, ప్రతిపక్షాలు మాత్రం అమలులో జాప్యం మరియు రాజకీయ వ్యూహాలపై అనుమానాలు వ్యక్తం చేస్తున్నాయి.