బెంగళూరులో చోటుచేసుకున్న ఒక ఘటన ఇప్పుడు సోషల్ మీడియాలో చర్చనీయాంశంగా మారింది. గతంలో రాజకీయ నాయకులపై చేసిన వ్యాఖ్యల నేపథ్యంలో ఒక స్టాండప్ కమెడియన్ ప్రదర్శనను అడ్డుకోవడం కలకలం రేపింది.
బెంగళూరులోని కోరమంగళ ప్రాంతంలో శనివారం రాత్రి నిర్వహించిన స్టాండప్ కామెడీ షోలో ఉద్రిక్తత చోటుచేసుకుంది. ప్రముఖ కమెడియన్ శరత్ ఉదయ్ ప్రదర్శన ఇస్తుండగా, తెలుగుదేశం పార్టీ (TDP) మద్దతుదారులు ఒక్కసారిగా స్టేజీపైకి వచ్చి కార్యక్రమాన్ని అడ్డుకున్నారు.
సుమారు రెండున్నర సంవత్సరాల క్రితం శరత్ ఉదయ్ మాజీ ముఖ్యమంత్రి నారా చంద్రబాబు నాయుడుపై కొన్ని జోకులు వేశారు. ఆ సమయంలోనే ఈ అంశంపై వివాదం రేగడంతో శరత్ బహిరంగంగా క్షమాపణలు కూడా చెప్పారు. అయితే, ఆ పాత వీడియోలు మళ్లీ సర్క్యులేట్ కావడంతో కోరమంగళలో జరుగుతున్న షో గురించి తెలుసుకున్న టీడీపీ మద్దతుదారులు అక్కడికి చేరుకున్నారు.
ప్రదర్శన మధ్యలో అంతరాయం: షో జరుగుతుండగానే గుంపుగా వచ్చిన మద్దతుదారులు శరత్ను అడ్డుకున్నారు.శరత్ గతంలోనే క్షమాపణ చెప్పినట్లు వివరించినప్పటికీ, వారు వినిపించుకోలేదు. ప్రేక్షకుల సమక్షంలో స్టేజీపైనే మరోసారి క్షమాపణ చెప్పాలని ఆయనను బలవంతం చేశారు.
ఈ మొత్తం ఉదంతం అక్కడ ఉన్న సీసీ కెమెరాల్లో రికార్డ్ అయింది. షోకు వచ్చిన ప్రేక్షకులు కూడా ఈ ఘటనతో భయాందోళనకు గురయ్యారు.ఈ ఘటనపై నెటిజన్లు భిన్నాభిప్రాయాలు వ్యక్తం చేస్తున్నారు.తమ నేతను కించపరిచేలా మాట్లాడితే చూస్తూ ఊరుకోబోమని, గౌరవం ఇవ్వడం నేర్చుకోవాలని వారు వాదిస్తున్నారు.
కామెడీ అనేది ఒక కళ అని, పాత విషయాలను పట్టుకుని ఇలా బలవంతంగా క్షమాపణలు చెప్పించడం భావప్రకటన స్వేచ్ఛను హరించడమేనని మరికొందరు అభిప్రాయపడుతున్నారు.ప్రస్తుతం ఈ ఘటనకు సంబంధించిన వీడియోలు వైరల్ అవుతుండటంతో, బెంగళూరు పోలీసులు దీనిపై ఏవైనా చర్యలు తీసుకుంటారా అన్నది వేచి చూడాలి.