కుమారుడి వల్ల తనకు ప్రాణహాని ఉందని జ్యోతిష్కుడు చెప్పిన మాటను నమ్మిన ఓ తండ్రి, కన్నబిడ్డనే దారుణంగా హత్య చేసిన ఘటన తమిళనాడులో వెలుగుచూసింది. తేని నగరానికి చెందిన వేందర్ బాలా అనే వ్యక్తి, తన స్నేహితుడితో కలిసి కుమారుడిని గొంతు నులిమి చంపి, మృతదేహాన్ని నదిలో పడేసినట్లు పోలీసుల విచారణలో తేలింది.
తేని ఎంజీఆర్నగర్కు చెందిన వేందర్ బాలా (50), తమిళగ మక్కళ్ మున్నేట్ర కళగం పార్టీలో క్రియాశీలకంగా పనిచేస్తున్నారు. ఇతని కుమారుడు శ్రీకాంత్ (20) ఆస్తి విషయమై తండ్రితో తరచూ గొడవపడేవాడు. గతేడాది సెప్టెంబరులో శ్రీకాంత్ అదృశ్యం కావడంతో, తల్లి రాజలక్ష్మి మదురై హైకోర్టులో పిటిషన్ దాఖలు చేశారు. కోర్టు ఆదేశాల మేరకు ఫిబ్రవరి 2026లో ఈ కేసు దర్యాప్తును సీబీసీఐడీకి బదిలీ చేశారు.
దర్యాప్తులో భాగంగా తేనికి చెందిన అలెక్స్పాండియన్ అనే వ్యక్తిని పోలీసులు అదుపులోకి తీసుకున్నారు. అతడిని విచారించగా, వేందర్ బాలా, కరుప్పయ్య అనే వ్యక్తితో కలిసి శ్రీకాంత్ను హత్య చేసి, మృతదేహాన్ని ముక్కలుగా నరికి ముల్లైపెరియార్ నదిలో పడేశామని వెల్లడించాడు. బుధవారం పోలీసులు వేందర్ బాలాను అదుపులోకి తీసుకుని విచారించగా, తండ్రి తన నేరాన్ని అంగీకరించాడు.
“నేను ఒక జ్యోతిష్కుడిని సంప్రదించాను. నా కుమారుడి ద్వారా నాకు ప్రమాదం పొంచి ఉందని అతను చెప్పాడు. అది నమ్మి, నా స్నేహితుడు కరుప్పయ్య సాయంతో శ్రీకాంత్ను గొంతు నులిమి చంపేశాను” అని వేందర్ బాలా పోలీసులకు వివరించాడు. మూఢనమ్మకాలతో తండ్రే కన్నబిడ్డను బలిగొనడం స్థానికంగా తీవ్ర సంచలనం సృష్టించింది.
హత్యలో ప్రధాన నిందితుడిగా ఉన్న కరుప్పయ్య కోసం పోలీసులు తీవ్రంగా గాలిస్తున్నారు. ఈ కేసులో మరిన్ని ఆధారాలను సేకరించేందుకు పోలీసులు ప్రయత్నిస్తున్నారు. కుమారుడిని హత్య చేసిన వేందర్ బాలాను ఇప్పటికే అరెస్టు చేసి కటకటాల్లోకి పంపారు. మూఢనమ్మకాల పేరుతో కన్నతండ్రే అమానుషానికి ఒడిగట్టడంపై ప్రజలు ఆగ్రహం వ్యక్తం చేస్తున్నారు.