హర్యానాలోని యమునానగర్ జిల్లాలో ప్రైవేట్ ఆస్పత్రి మరియు షాపింగ్ మాల్ బయట కాల్పులకు పాల్పడ్డ ఘటనలో ఇద్దరు మైనర్లతో సహా ముగ్గురు యువకులను పోలీసులు అరెస్ట్ చేశారు. కాసన్పూర్ ప్రాంతం సమీపంలో పోలీసులతో జరిగిన ఎదురుకాల్పుల్లో వీరిని అదుపులోకి తీసుకున్నారు.
పోలీసుల వివరాల ప్రకారం, నిందితులు పోలీసులపై కాల్పులు జరపగా, ప్రతిగా పోలీసులు కాల్పులు జరిపారు. ఈ ఘటనలో ఇద్దరు యువకులకు తూటా గాయాలు కాగా, మూడో వ్యక్తి బైక్పై నుంచి కింద పడిపోవడంతో గాయపడ్డాడు. ముగ్గురినీ ఆస్పత్రికి తరలించి చికిత్స అనంతరం అరెస్ట్ చేశారు.
ఈ ముగ్గురు యువకులు రెండు కాల్పుల కేసుల్లో నిందితులుగా ఉన్నారు. ఒకటి ప్రైవేట్ ఆస్పత్రిలో, మరొకటి షాపింగ్ మాల్ బయట జరిగిన కాల్పుల ఘటన. ఈ రెండు ఘటనల్లో ఎలాంటి ప్రాణనష్టం జరగలేదని పోలీసులు తెలిపారు. ప్రాథమిక దర్యాప్తులో ఇది బెదిరింపులు (ఎక్స్టోర్షన్) మరియు భయాందోళన వాతావరణం సృష్టించడానికే సంబంధించిన కేసుగా తేలిందని జిల్లా ఎస్పీ కమల్ దీప్ గోయల్ వెల్లడించారు.
అరెస్ట్ అయిన వారిలో ఇద్దరు కర్నాల్ జిల్లాకు చెందిన మైనర్లు కాగా, మూడో వ్యక్తి కురుక్షేత్ర జిల్లాకు చెందిన గుర్లాల్ సింగ్గా పోలీసులు గుర్తించారు. సీసీటీవీ ఫుటేజీలో ముఖాలు కప్పుకుని ముగ్గురు యువకులు శనివారం రాత్రి ఆస్పత్రిలోకి ప్రవేశించి, రిసెప్షన్ వద్ద కాల్పులు జరిపి పారిపోయినట్లు కనిపించింది. ఆస్పత్రిలో 13–14 రౌండ్లు, అనంతరం మాల్ బయట 3–4 రౌండ్లు కాల్పులు జరిపినట్లు పోలీసులు తెలిపారు. సమాచారం అందగానే పోలీసులు చెక్పోస్టులు ఏర్పాటు చేసి గాలింపు చేపట్టారు. ఆదివారం ఉదయం బైక్పై వెళ్తున్న నిందితులను కాసన్పూర్ ప్రాంతంలో చుట్టుముట్టారు. వారి వద్ద నుంచి ఒక విదేశీ పిస్టల్, ఒక దేశీ తయారీ పిస్టల్ను స్వాధీనం చేసుకున్నారు. కేసుపై మరింత దర్యాప్తు కొనసాగుతోందని పోలీసులు తెలిపారు.