జీ రామ్ జీ బిల్లుకు లోక్‌సభ ఆమోదం

ఎంజీఎన్‌ఆర్‌ఈజీఏ (MGNREGA)కు ప్రత్యామ్నాయంగా కేంద్ర ప్రభుత్వం తీసుకొచ్చిన జీ రామ్ జీ బిల్లుకు లోక్‌సభ ఆమోదం తెలిపింది. అయితే ఈ బిల్లు ఆమోదం సందర్భంగా విపక్షాల తీవ్ర నిరసనల మధ్య సభలో గందరగోళ పరిస్థితులు నెలకొన్నాయి.

వికసిత్ భారత్ – గ్యారంటీ ఫర్ రోజ్గార్ అండ్ ఆజీవికా మిషన్ (గ్రామీణ్) గా పిలవబడుతున్న VB–G Ram G Bill, 2025ను గురువారం లోక్‌సభ ఆమోదించింది. కేంద్రం ప్రవేశపెట్టిన ఈ బిల్లుకు వ్యతిరేకంగా విపక్ష సభ్యులు సభ వెల్‌లోకి దూసుకెళ్లి, బిల్లు ప్రతులను చించివేసి నిరసన వ్యక్తం చేశారు. బిల్లును స్టాండింగ్ కమిటీకి పంపాలని వారు డిమాండ్ చేశారు. అయితే ఈ అంశంపై ఇప్పటికే విస్తృతంగా చర్చ జరిగిందని స్పీకర్ చెప్పడంతో నిరసనలు మరింత ఉద్ధృతమయ్యాయి. బిల్లు ఆమోదం అనంతరం లోక్‌సభను రోజుకు వాయిదా వేసి, శుక్రవారం ఉదయం 11 గంటలకు తిరిగి సమావేశం కానున్నట్లు ప్రకటించారు. ఈ బిల్లు ఇప్పుడు రాజ్యసభకు వెళ్లనుంది.

కాంగ్రెస్ నేత ప్రియాంక గాంధీ వాద్రా, డీఎంకే నేత టీఆర్ బాలు, సమాజ్‌వాది పార్టీకి చెందిన ధర్మేంద్ర యాదవ్ సహా పలువురు విపక్ష నేతలు ఈ బిల్లును తీవ్రంగా వ్యతిరేకించారు. ఎంజీఎన్‌ఆర్‌ఈజీఏ నుంచి మహాత్మా గాంధీ పేరును తొలగించడం జాతిపితకు అవమానమని వారు వ్యాఖ్యానించారు. అంతేకాకుండా, ఈ కొత్త చట్టం రాష్ట్రాలపై అదనపు ఆర్థిక భారం మోపుతుందని ఆరోపించారు.

ఈ బిల్లుపై చర్చకు సమాధానం ఇస్తూ కేంద్ర గ్రామీణాభివృద్ధి మంత్రి శివరాజ్ సింగ్ చౌహాన్ విపక్షాల ఆరోపణలను తిప్పికొట్టారు. ఎంజీఎన్‌ఆర్‌ఈజీఏ అమలుకు ముందే ఉద్యోగ హామీ పథకాలు ఉన్నాయని చెప్పారు. 2009 లోక్‌సభ ఎన్నికలను దృష్టిలో పెట్టుకునే ఎంజీఎన్‌ఆర్‌ఈజీఏకు మహాత్మా గాంధీ పేరు జోడించారని ఆయన ఆరోపించారు.

కొందరు సభ్యులు సభ వెల్‌లోకి వచ్చి కాగితాలు చించి స్పీకర్ వైపు విసిరేయడంతో పరిస్థితి ఉద్రిక్తంగా మారింది. ప్రియాంక గాంధీ చేసిన ఆరోపణలను ఖండించిన చౌహాన్, కాంగ్రెస్ పార్టీ చరిత్రపరంగా రాజకీయ లాభాల కోసం పేర్లు జోడిస్తోందని విమర్శించారు. అలాగే గాంధీ సిద్ధాంతాలను కాంగ్రెస్ే విస్మరించిందని వ్యాఖ్యానించారు. ఎంజీఎన్‌ఆర్‌ఈజీఏ అమలులో లోపాలున్నాయని, పనుల నాణ్యతపై ప్రభావం పడిందని ఆయన పేర్కొన్నారు.