మాజీ మంత్రి అంబటి రాంబాబుకు పోలీసులు నోటీసులు జారీ చేయడం రాజకీయ వర్గాల్లో చర్చనీయాంశమైంది. సెక్షన్ 30 అమలులో ఉన్న నేపథ్యంలో ర్యాలీగా వెళ్లరాదని స్పష్టంగా సూచిస్తూ ఆయనకు నోటీసులు అందించారు. రాజమండ్రి నుంచి గుంటూరుకు కాన్వాయ్తో బయల్దేరిన అంబటి వాహనాలను మహాలక్ష్మి ఆలయం సమీపంలో పోలీసులు అడ్డుకున్నారు.
పోలీసుల చర్యపై ఆగ్రహం వ్యక్తం చేసిన అంబటి, “నా ఇంటికి వెళ్తుంటే ఎందుకు ఆంక్షలు?” అంటూ ప్రశ్నించారు. గతంలో చంద్రబాబు ర్యాలీగా వెళ్లలేదా? అని ఆయన నిలదీశారు. కాపు నేతలు, పార్టీ శ్రేణులు తనను కలవడానికి వస్తే దాంట్లో తప్పేంటి? అని ప్రశ్నించారు.
పోలీసుల తీరుకు నిరసనగా పాదయాత్ర చేస్తానని ప్రకటిస్తూ కారు దిగిన అంబటి కొంతసేపు అక్కడే నిలిచారు. దీంతో ఉద్రిక్త పరిస్థితి నెలకొంది. అనంతరం పరిస్థితిని సమీక్షించిన పోలీసులు వాహనాలకు అనుమతి ఇవ్వడంతో అంబటి మళ్లీ కారులో గుంటూరు దిశగా ప్రయాణం కొనసాగించారు.
ఈ ఘటన రాజకీయ వాతావరణాన్ని మరింత వేడెక్కించింది. ప్రభుత్వం, పోలీసులు ఒకే విధంగా వ్యవహరించాలనే డిమాండ్లు వినిపిస్తున్నాయి. మరోవైపు, చట్టం అమలులో భాగంగానే చర్యలు తీసుకున్నామని పోలీసులు వివరణ ఇచ్చినట్లు సమాచారం.