టీటీడీ చైర్మన్ బి.ఆర్. నాయుడు తీరుపై తీవ్ర స్థాయిలో మండిపడ్డారు ప్రొద్దుటూరు మాజీ ఎమ్మెల్యే రాచమల్లు శివప్రసాద్ రెడ్డి . పవిత్రమైన పుణ్యక్షేత్రానికి సంబంధించిన అత్యున్నత బాధ్యతలో ఉన్న వ్యక్తి మాట్లాడే మాటలు సభ్య సమాజం సిగ్గుపడేలా ఉన్నాయని ఆయన విమర్శించారు. ముఖ్యంగా హిందువులు అత్యంత పవిత్రంగా భావించే భగవద్గీతపై బి.ఆర్. నాయుడు చేసిన వ్యాఖ్యలు తీవ్రంగా అభ్యంతరకరమని అన్నారు.
టీటీడీ చైర్మన్ పదవిలో కొనసాగుతున్న బి.ఆర్. నాయుడు వెంటనే రాజీనామా చేయాలని రాచమల్లు డిమాండ్ చేశారు. ఆయన బాధ్యతలు చేపట్టినప్పటి నుంచి తిరుమలలో అనేక వివాదాలు తలెత్తాయని ఆరోపించారు. ముఖ్యంగా లడ్డూ ప్రసాదం కల్తీ ఆరోపణలు, ఇతర అపచారాలు భక్తుల్లో ఆందోళన కలిగిస్తున్నాయని పేర్కొన్నారు. ఈ అంశాలన్నీ దేవస్థానం ప్రతిష్టను దెబ్బతీసే విధంగా ఉన్నాయని అన్నారు.
‘ఫ్యామిలీ ఫ్రెండ్’ పేరుతో సాగిస్తున్న వ్యవహారాలు భక్తి పరవశాన్ని దెబ్బతీస్తున్నాయని, ఇవి పవిత్ర స్థలానికి తగినవి కావని విమర్శించారు. ఇటువంటి పరిస్థితుల్లో ప్రభుత్వం వెంటనే జోక్యం చేసుకుని విషయాలను గంభీరంగా పరిగణించాలని కోరారు.
టీటీడీ వంటి పవిత్ర సంస్థను మరింత గౌరవప్రదంగా, పారదర్శకంగా నడిపించగల సమర్థుడైన వ్యక్తిని నియమించాలని రాచమల్లు శివప్రసాద్ రెడ్డి ప్రభుత్వాన్ని విజ్ఞప్తి చేశారు. భక్తుల విశ్వాసాన్ని కాపాడడం ప్రభుత్వ బాధ్యత అని ఆయన స్పష్టం చేశారు.