భారత్ -బంగ్లా..సిరీస్ రద్దు

భారత మహిళా క్రికెట్ జట్టు, బంగ్లాదేశ్ మహిళా క్రికెట్ జట్టు మధ్య డిసెంబర్ నెలలో జరగాల్సిన పరిమిత ఓవర్ల సిరీస్ (3 వన్డేలు, 3 టీ20లు) రద్దైనట్లు తెలుస్తోంది. భారత క్రికెట్ నియంత్రణ మండలి (BCCI) వర్గాల నుంచి అందిన సమాచారం ప్రకారం, ఈ సిరీస్ నిర్వహణకు పర్మిషన్ లభించకపోవడమే దీనికి ప్రధాన కారణం.

బీసీసీఐ వర్గాలు ఈ విషయాన్ని ధృవీకరిస్తూ, డిసెంబర్ నెలలో ప్రత్యామ్నాయ సిరీస్ కోసం ఏర్పాట్లు చేస్తామని వెల్లడించాయి. షెడ్యూల్ ప్రకారం భారత జట్టు బంగ్లాదేశ్‌తో మూడు వన్డేలు, మూడు టీ20 మ్యాచ్‌లు ఆడాల్సి ఉంది.

మహిళల సిరీస్ రద్దు కాకముందే, కొద్ది రోజుల కిందట పురుషుల క్రికెట్‌లో కూడా భారత్, బంగ్లాదేశ్ జట్ల మధ్య జరగాల్సిన సిరీస్ వాయిదా పడింది. వాస్తవానికి, భారత పురుషుల జట్టు పరిమిత ఓవర్ల సిరీస్ కోసం ఆగస్టులో బంగ్లాదేశ్‌లో పర్యటించాల్సి ఉంది. అయితే, బిజీ షెడ్యూల్ కారణంగా ఆ సిరీస్‌ను 2026 సెప్టెంబర్‌కు మార్చారు.

పురుషుల, మహిళల సిరీస్‌లు రద్దు కావడం లేదా వాయిదా పడటం బంగ్లాదేశ్ క్రికెట్‌కు పెద్ద ఎదురుదెబ్బగా క్రీడా విశ్లేషకులు అభిప్రాయపడుతున్నారు. ముఖ్యంగా మహిళా క్రికెట్ జట్టుకు అంతర్జాతీయ మ్యాచ్‌లు ఆడటం ద్వారా లభించే అనుభవం, ర్యాంకింగ్స్‌లో పురోగతికి ఇది అడ్డంకిగా మారనుంది.