తెలంగాణ రాజకీయాల్లో అధికార కాంగ్రెస్ మరియు ప్రతిపక్ష బీఆర్ఎస్ మధ్య మాటల యుద్ధం ముదురుతోంది. మాజీ మంత్రి కేటీఆర్ చేసిన వ్యాఖ్యలకు భువనగిరి ఎంపీ చామల కిరణ్ కుమార్ రెడ్డి సోషల్ మీడియా వేదికగా తీవ్ర స్థాయిలో కౌంటర్ ఇచ్చారు. బీఆర్ఎస్ పార్టీ పరిస్థితిపై ఆయన చేసిన వ్యాఖ్యలు ఇప్పుడు రాజకీయ వర్గాల్లో చర్చనీయాంశంగా మారాయి.
బీఆర్ఎస్ పార్టీని ఎంపీ చామల ‘చచ్చిన శవం’తో పోల్చారు. ముఖ్యమంత్రి రేవంత్ రెడ్డి ఇదివరకే చెప్పినట్లుగా.. ఆ పార్టీ ఎంత లేపినా లేవదని, దాని రాజకీయ భవిష్యత్తు ముగిసిపోయిందని ఎద్దేవా చేశారు.పార్టీ మనుగడ కోసం కేటీఆర్ తన నాయకులను రోడ్ల మీదకు రావాలని బతిమిలాడుకుంటున్నారని, కానీ నాయకులు మాత్రం స్పందించడం లేదని చామల విమర్శించారు.
ఫామ్హౌస్ vs సోషల్ మీడియా: “కేసీఆర్ ఫామ్హౌస్కు పరిమితమయ్యారు.. కేటీఆర్ సోషల్ మీడియాలో కాలక్షేపం చేస్తున్నారు” అంటూ తండ్రీకొడుకులపై చామల విరుచుకుపడ్డారు. సొంత నాయకులను మాత్రం రోడ్ల మీద పడి గొడవలు చేయాలని ఎగదోస్తున్నారని మండిపడ్డారు.
కేటీఆర్ మాటలు నమ్మితే బీఆర్ఎస్ నేతల బతుకులు ప్రజాభవన్ గేటు దగ్గర కాపలా ఉండటానికే పరిమితమవుతాయని ఆయన హెచ్చరించారు.ఇటీవల కాలంలో కాంగ్రెస్ ప్రభుత్వంపై కేటీఆర్ వరుసగా అవినీతి ఆరోపణలు మరియు విమర్శలు గుప్పిస్తున్నారు. దీనికి కౌంటర్గా కాంగ్రెస్ ఎంపీలు, మంత్రులు బీఆర్ఎస్ పదేళ్ల పాలనలో జరిగిన లోపాలను, అప్పులను ఎత్తిచూపుతున్నారు. ముఖ్యంగా కేసీఆర్ ఫామ్హౌస్ రాజకీయాలపై కాంగ్రెస్ నేతలు పదే పదే విమర్శలు చేస్తున్నారు.
అధికారం కోల్పోయిన ఫ్రస్ట్రేషన్లో కేటీఆర్ తప్పుడు ప్రచారం చేస్తున్నారు. ప్రజలు వారిని ఇప్పటికే తిరస్కరించారు అన్నారు ఎంపీ చామల కిరణ్ కుమార్ రెడ్డి.
ప్రస్తుతం ఈ ట్వీట్ యుద్ధం తెలంగాణ రాజకీయాల్లో హీట్ పెంచుతోంది. కేటీఆర్ ఈ విమర్శలకు ఎలా స్పందిస్తారో వేచి చూడాలి.