మెదక్ జిల్లాలో కులాంతర వివాహం చేసుకున్న నవ వధువును ఆమె కుటుంబ సభ్యులే బలవంతంగా కిడ్నాప్ చేసిన ఘటన స్థానికంగా కలకలం రేపింది. పోలీసులు కౌన్సెలింగ్ ఇచ్చి పంపిన మరుసటి రోజే వధువు తరఫు వారు దాడికి పాల్పడటం గమనార్హం. వరుడు ప్రణయ్ కుటుంబ సభ్యులు ఆరోపిస్తున్న దాని ప్రకారం ఈ దాడికి సంబంధించిన పూర్తి వివరాలు ఇలా ఉన్నాయి.
ఎల్లపూర్ గ్రామానికి చెందిన ప్రణయ్, ఒక యువతిని ప్రేమించి ఈ నెల 6న కులాంతర వివాహం చేసుకున్నాడు. ఈ పెళ్లి ఇష్టం లేని యువతి కుటుంబ సభ్యులు, ఆమెను ఎలాగైనా ఇంటికి తీసుకురావాలని ప్లాన్ చేశారు. పథకం ప్రకారం నలుగురు కార్లలో వచ్చిన వధువు కుటుంబ సభ్యులు, బంధువులు ప్రణయ్ ఇంటిని చుట్టుముట్టారు. ఇంట్లోకి బలవంతంగా చొరబడి బీభత్సం సృష్టించారు.
వధువును కిడ్నాప్ చేసే క్రమంలో అడ్డువచ్చిన వరుడు ప్రణయ్, అతని కుటుంబ సభ్యులు అలాగే స్థానికులపై వధువు తరఫు వారు దాడికి పాల్పడ్డారు. అందరూ చూస్తుండగానే యువతిని లాక్కెళ్లి కారులో ఎక్కించుకుని అక్కడి నుంచి పరారయ్యారు. పట్టపగలే జరిగిన ఈ ఘటనతో గ్రామస్థులు తీవ్ర భయాందోళనకు గురయ్యారు.
ఈ వివాహానికి సంబంధించి అంతకుముందే ఇరువర్గాలకు పోలీసులు స్టేషన్లో కౌన్సెలింగ్ ఇచ్చారు. అయినప్పటికీ వధువు తరఫు వారు ఇంతటి దారుణానికి ఒడిగట్టడం గమనార్హం. తమకు ప్రాణహాని ఉందని తెలిసినా, పోలీసులకు ఫిర్యాదు చేసినా వారు స్పందించడం లేదని ప్రణయ్ కుటుంబ సభ్యులు ఆరోపిస్తున్నారు. తమకు రక్షణ కల్పించడంలో, కిడ్నాప్కు గురైన యువతిని కాపాడటంలో పోలీసులు నిర్లక్ష్యంగా వ్యవహరిస్తున్నారని వారు ఆవేదన వ్యక్తం చేస్తున్నారు. ప్రస్తుతం వధువు ఆచూకీ కోసం, నిందితులపై చర్యల కోసం వరుడి కుటుంబం పోలీసులను వేడుకుంటోంది.