 శ్రీహరిని ఆస్తి కోసం సొంత బావమరిదే అత్యంత దారుణంగా హత్య చేసిన ఉదంతం వెలుగులోకి వచ్చింది. నిందితుడు పథకం ప్రకారం కుక్కలను చంపే ఇంజెక్షన్లు ఇచ్చి హత్య చేసి, దాన్ని గుండెపోటుగా చిత్రీకరించే ప్రయత్నం చేశాడు.){kind=link}
నెల్లూరు జిల్లా బుచ్చిరెడ్డిపాలెం మండల ఏవో (AO) శ్రీహరిని ఆస్తి కోసం సొంత బావమరిదే అత్యంత దారుణంగా హత్య చేసిన ఉదంతం వెలుగులోకి వచ్చింది. నిందితుడు పథకం ప్రకారం కుక్కలను చంపే ఇంజెక్షన్లు ఇచ్చి హత్య చేసి, దాన్ని గుండెపోటుగా చిత్రీకరించే ప్రయత్నం చేశాడు.
శ్రీహరి తన బావమరిది హరికృష్ణను నమ్మి కోట్లాది రూపాయల విలువైన ఆస్తిని, అప్పుగా కొంత నగదును అతనికి రాసిచ్చాడు. అయితే, ఇటీవల శ్రీహరి తనకు ఇల్లు కట్టుకోవాలని ఉందని, ఆ ఆస్తిని, డబ్బును తిరిగి ఇవ్వాలని హరికృష్ణను కోరాడు. ఆస్తిని తిరిగి ఇచ్చే ఉద్దేశ్యం లేని హరికృష్ణ, బావను అడ్డు తొలగించుకోవాలని నిర్ణయించుకున్నాడు. ఇందుకు మరో ఇద్దరు వ్యక్తులు రవీంద్ర, యానాదిలను కూలీలుగా నియమించుకున్నాడు.
జూన్ 15న దైవదర్శనం కోసం పెంచలకోనకు వెళ్దామని చెప్పి శ్రీహరిని హరికృష్ణ కారులో తీసుకెళ్లాడు. తిరుగు ప్రయాణంలో చేజర్ల మండలం వద్ద కారును ఆపగానే, అక్కడ కాపుకాసిన రవీంద్ర, యానాదిలు శ్రీహరిని పట్టుకున్నారు. హరికృష్ణ తన వెంట తెచ్చుకున్న కుక్కలను చంపే ఇంజెక్షన్లను శ్రీహరికి వేయడంతో, ఆయన అక్కడికక్కడే గుండె ఆగి మరణించారు. అనంతరం, దీన్ని గుండెపోటుగా నమ్మిస్తూ మృతదేహాన్ని స్వగ్రామం మినగల్లుకు తరలించారు.
శ్రీహరి శరీరంపై గాయాలు ఉండటాన్ని గమనించిన తోటి ఉద్యోగులు అప్పుడే అనుమానం వ్యక్తం చేశారు. అయితే, ఆ సమయంలో కుటుంబ సభ్యులు ఫిర్యాదు చేయకపోవడంతో, నిందితులు మృతదేహాన్ని దహనం చేసి ఆధారాలను తుడిచిపెట్టే ప్రయత్నం చేశారు. కానీ, ఇటీవల హరికృష్ణ మిగిలిన ఆస్తిని కూడా తన పేరున రాసివ్వాలని శ్రీహరి భార్య లావణ్యతో గొడవకు దిగడంతో ఆమెకు అనుమానం బలపడింది. వెంటనే ఆమె ఎస్పీకి ఫిర్యాదు చేయడంతో డీఎస్పీ ఘట్టమనేని శ్రీనివాసరావు ఆధ్వర్యంలో దర్యాప్తు మొదలైంది.
పోలీసుల విచారణలో నిందితులు తమ నేరాన్ని అంగీకరించారు. హత్యకు సహకరించిన రవీంద్ర, యానాదిలను పోలీసులు అరెస్టు చేశారు. ప్రధాన నిందితుడు హరికృష్ణ పరారీలో ఉండగా, అతని కోసం పోలీసులు ముమ్మరంగా గాలిస్తున్నారు. ఆస్తి కోసం కట్టుకున్న బావనే పొట్టనబెట్టుకున్న ఈ ఘటన స్థానికంగా తీవ్ర సంచలనం సృష్టించింది.