 స్వంత శాఖకు చెందిన వాహనం ఢీకొనడంతో ప్రాణాలు కోల్పోయారు.){kind=link}
సంగారెడ్డి జిల్లాలోని మనూరు పోలీస్ స్టేషన్ పరిధిలో అత్యంత విషాదకరమైన ఘటన చోటుచేసుకుంది. విధుల్లో ఉన్న ఒక సహాయ సబ్ ఇన్స్పెక్టర్ (ASI) స్వంత శాఖకు చెందిన వాహనం ఢీకొనడంతో ప్రాణాలు కోల్పోయారు. అయితే, ఇది ప్రమాదం కాదు, కావాలని చేసిన హత్యేనని మృతుడి కుటుంబ సభ్యులు ఆరోపిస్తుండటం ఇప్పుడు పోలీస్ వర్గాల్లో కలకలం రేపుతోంది.
మనూరు పోలీస్ స్టేషన్ ఎదుట ఏఎస్ఐ గోవింద్ నాయక్ విధులు నిర్వర్తిస్తుండగా, స్టేషన్కు చెందిన పోలీస్ వాహనం ఒక్కసారిగా ఆయనపైకి దూసుకొచ్చింది. ఈ ప్రమాదంలో గోవింద్ నాయక్ తీవ్రంగా గాయపడ్డారు. గమనించిన తోటి సిబ్బంది వెంటనే ఆయనను చికిత్స నిమిత్తం ఆసుపత్రికి తరలించారు. పరిస్థితి విషమించడంతో చికిత్స పొందుతూ ఆయన మృతి చెందారు.
ప్రమాద సమయంలో వాహనాన్ని నడుపుతున్న డ్రైవర్ రామారావు, ఘటన జరిగిన వెంటనే అక్కడి నుండి పరారయ్యాడు. పోలీసులు అతడి కోసం గాలింపు చర్యలు చేపట్టినట్లు వెల్లడించారు.ఈ ఘటనపై ఏఎస్ఐ గోవింద్ నాయక్ కుటుంబ సభ్యులు తీవ్ర ఆగ్రహం వ్యక్తం చేస్తున్నారు. ఇది ఏమాత్రం ప్రమాదం కాదని, డ్రైవర్ రామారావు కక్షపూరితంగానే ఏఎస్ఐపైకి వాహనాన్ని ఎక్కించి హత్య చేశాడని వారు ఆరోపిస్తున్నారు. గత కొంతకాలంగా వీరిద్దరి మధ్య ఉన్న విభేదాలే ఈ అఘాయిత్యానికి కారణమని వారు అనుమానం వ్యక్తం చేస్తున్నారు.
ఘటనపై కేసు నమోదు చేసుకున్న ఉన్నతాధికారులు విచారణ ప్రారంభించారు.పరారీలో ఉన్న డ్రైవర్ రామారావును పట్టుకుంటేనే అసలు నిజాలు బయటకు వస్తాయని పోలీసులు భావిస్తున్నారు.ఇది కావాలని చేసిన హత్యా? లేక బ్రేకులు ఫెయిల్ అవ్వడం వల్ల జరిగిన ప్రమాదమా? అనే కోణంలో ఫోరెన్సిక్ బృందాలు కూడా తనిఖీలు చేపట్టనున్నాయి. విధి నిర్వహణలో ఉన్న అధికారి ఇలా ప్రాణాలు కోల్పోవడం జిల్లా పోలీస్ శాఖలో తీవ్ర విషాదాన్ని నింపింది.