పిల్లలను కంటికి రెప్పలా కాపాడాల్సిన డేకేర్ సెంటరే చిన్నారుల పాలిట నరకప్రాయంగా మారింది. పసిపిల్లలను కట్టేయడం, వారు ఏడవకుండా నోట్లో గుడ్డలు కుక్కడం వంటి అత్యంత అమానవీయ చర్యలకు పాల్పడిన ఘటన ఇండోనేషియాలోని యోగ్యకర్త నగరంలో వెలుగులోకి వచ్చింది.
యోగ్యకర్తలోని ఒక ప్రముఖ డేకేర్ సెంటర్ నిర్వాహకులు చిన్నారుల పట్ల క్రూరంగా వ్యవహరిస్తున్నట్లు పోలీసుల విచారణలో తేలింది. ఈ సెంటర్ లో మొత్తం 103 మంది పిల్లలు ఉండగా, అందులో 53 మంది చిన్నారులు తీవ్రమైన శారీరక, మానసిక హింసకు గురైనట్లు గుర్తించారు. పిల్లలు అల్లరి చేస్తున్నారని లేదా ఏడుస్తున్నారని వారి చేతులు, కాళ్లు కట్టేయడం, గొంతు బయటకు రాకుండా నోట్లో గుడ్డలు కుక్కడం వంటి ఘాతుకాలకు అక్కడి సిబ్బంది పాల్పడ్డారు.
కొందరు పిల్లల శరీరాలపై గాయాలను గమనించిన తల్లిదండ్రులు ఫిర్యాదు చేయడంతో పోలీసులు రంగంలోకి దిగారు. రహస్యంగా జరిపిన తనిఖీలు, సీసీటీవీ దృశ్యాల ఆధారంగా అక్కడి భయానక పరిస్థితులు బయటపడ్డాయి. ఈ దారుణానికి సంబంధించి పోలీసులు డేకేర్ సెంటర్ నిర్వాహకులతో సహా 13 మంది సిబ్బందిని అరెస్టు చేశారు. పసిపిల్లల ప్రాణాలతో చెలగాటమాడుతూ, వారిని చిత్రహింసలకు గురిచేసినందుకు వీరిపై కఠినమైన సెక్షన్ల కింద కేసులు నమోదు చేశారు.
ఈ ఘటనపై స్థానికులు, బాధిత తల్లిదండ్రులు తీవ్ర ఆగ్రహం వ్యక్తం చేస్తున్నారు. “పసిపిల్లల పట్ల ఇంత క్రూరంగా వ్యవహరించిన వారికి జైలు శిక్ష సరిపోదు, నిందితులకు మరణశిక్ష విధించాలి” అని వారు డిమాండ్ చేస్తూ నిరసన చేపట్టారు. చిన్నారుల భద్రతపై భరోసా కల్పించాల్సిన ప్రభుత్వమే ఇలాంటి సెంటర్ల నిర్వహణపై కఠిన నిబంధనలు అమలు చేయాలని కోరుతున్నారు. నమ్మకంతో పంపిన డేకేర్ సెంటర్లోనే పిల్లలు హింసకు గురికావడం అంతర్జాతీయంగా చర్చనీయాంశమైంది. బాధితులైన 53 మంది చిన్నారులకు ప్రస్తుతం వైద్య సాయం మరియు కౌన్సెలింగ్ అందిస్తున్నారు.