రేవంత్ రెడ్డి, కేసీఆర్లను గ్రహాలతో పోలుస్తూ కేంద్రమంత్రి బండి సంజయ్ తీవ్ర విమర్శలు చేశారు. ముఖ్యమంత్రి రేవంత్ రెడ్డిని ‘రాహువు’ తో…మాజీ ముఖ్యమంత్రి కేసీఆర్ను ‘కేతువు’ తో పోల్చారు. వీరిద్దరి వల్ల రాష్ట్ర ప్రజలు ఇబ్బందులు పడుతున్నారని, తెలంగాణకు పట్టిన గ్రహణాలని ఆయన అభివర్ణించారు.
కాళేశ్వరం ప్రాజెక్టులో జరిగిన అవినీతిపై కాంగ్రెస్ ప్రభుత్వం మౌనంగా ఉండటాన్ని బండి సంజయ్ ప్రశ్నించారు. కాళేశ్వరం ప్రాజెక్ట్ కేసీఆర్కు, కాంగ్రెస్ పార్టీకి ఒక పేటీఎంలా మారింది అని ఎద్దేవా చేశారు.
కేసీఆర్ కుటుంబంలో ఒక్కరిపైనైనా రేవంత్ ప్రభుత్వం ఇప్పటివరకు ఎందుకు చర్యలు తీసుకోలేదని ఆయన నిలదీశారు. కేవలం మాటలకే పరిమితమై, క్షేత్రస్థాయిలో అవినీతిపరులను కాపాడుతున్నారని ఆరోపించారు. రాష్ట్ర ప్రభుత్వం కేంద్రానికి రాసిన లేఖలో అసలు ఏముందో బహిరంగ పరచాలని ఆయన డిమాండ్ చేశారు.
బిజెపి ఎంపీ తేజస్వి సూర్య చేసిన వివాదాస్పద వ్యాఖ్యల నేపథ్యంలో బండి సంజయ్ ఆయనకు మద్దతుగా నిలిచారు.తేజస్వి సూర్య తన వ్యాఖ్యలను దేశ స్వాతంత్య్ర సమరయోధులతో పోల్చి చెప్పారని, కానీ కొందరు కావాలనే వాటిని వక్రీకరించారని బండి సంజయ్ పేర్కొన్నారు.పాకిస్థాన్ విభజన సమయంలో జరిగిన బలిదానాల మాదిరిగానే, అనేక పోరాటాలను స్ఫూర్తిగా తీసుకుని తేజస్వి మాట్లాడారని, అందులో తప్పులేదని ఆయన సమర్థించారు.
బండి సంజయ్ వ్యాఖ్యలు గమనిస్తే, కాంగ్రెస్ మరియు బీఆర్ఎస్ పార్టీలు లోపాయికారీ ఒప్పందంతో ముందుకు వెళ్తున్నాయని ప్రజల్లోకి తీసుకెళ్లడమే లక్ష్యంగా కనిపిస్తోంది. ముఖ్యంగా కాళేశ్వరం అంశంలో రేవంత్ రెడ్డి వైఖరిని ఆయన తీవ్రంగా తప్పుబట్టారు.
రాజకీయ విశ్లేషణ: బీఆర్ఎస్ నేతలు కాంగ్రెస్లో చేరుతున్న వేళ, బండి సంజయ్ చేస్తున్న ఈ ‘రాహు-కేతు’ విమర్శలు రాబోయే ఎన్నికల్లో బీజేపీకి రాజకీయంగా ఎంతవరకు కలిసి వస్తాయో వేచి చూడాలి.