ఏపీ,తెలంగాణలో మూడో దశ SIR

దేశవ్యాప్తంగా ఓటర్ల జాబితాను మరింత పారదర్శకంగా, దోషరహితంగా తీర్చిదిద్దేందుకు కేంద్ర ఎన్నికల సంఘం (ECI) సిద్ధమైంది. ఇందులో భాగంగా మూడో దశ ప్రత్యేక సమగ్ర సవరణ ప్రక్రియకు సంబంధించి కీలక ప్రకటన విడుదల చేసింది. ఆంధ్రప్రదేశ్, తెలంగాణ సహా మొత్తం 16 రాష్ట్రాలు మరియు 3 కేంద్రపాలిత ప్రాంతాల్లో ఈ ప్రక్రియ జరగనుంది.

ఓటర్ల జాబితాలో కొత్తగా పేర్లు నమోదు చేసుకోవడం, మరణించిన లేదా ఊరు విడిచి వెళ్లిన వారి పేర్లను తొలగించడం, అడ్రస్ మార్పులు మరియు తప్పుల సవరణ కోసం ఈ కార్యక్రమాన్ని నిర్వహిస్తారు. అర్హులైన ప్రతి ఒక్కరికీ ఓటు హక్కు కల్పించడమే ఈ ప్రక్రియ ప్రధాన ఉద్దేశ్యం.

ఆంధ్రప్రదేశ్:

ప్రారంభం: జూన్ 15

ముగింపు: సెప్టెంబర్ 22

ఈ కాలంలో బూత్ స్థాయి అధికారులు (BLO) ఇంటింటికీ తిరిగి ఓటర్ల వివరాలను వెరిఫై చేస్తారు.

తెలంగాణ:

ప్రారంభం: జూన్ 25

ముగింపు: అక్టోబర్ 1

తెలంగాణలో జూన్ చివరి వారం నుండి అక్టోబర్ మొదటి వారం వరకు ఈ ప్రక్రియ కొనసాగుతుంది.

వచ్చే ఏడాది జనవరి 1 నాటికి 18 ఏళ్లు నిండబోయే యువతీ యువకులు ముందస్తుగా ఓటు కోసం దరఖాస్తు చేసుకోవచ్చు.ఓటర్ కార్డులో తప్పులు ఉన్నవారు (పేరు, వయస్సు, ఫోటో తదితరాలు) సవరణ కోరవచ్చు.ఒక నియోజకవర్గం నుండి మరో నియోజకవర్గానికి మారిన వారు ఓటు బదిలీ కోసం దరఖాస్తు చేయవచ్చు.

ఈ ప్రక్రియ అంతా పారదర్శకంగా జరిగేలా చూడాలని ఆయా రాష్ట్రాల ప్రధాన ఎన్నికల అధికారులను (CEO) ఈసీ ఆదేశించింది. ప్రజలు తమ ఓటు హక్కును సరిచూసుకోవాలని, ఏవైనా అభ్యంతరాలు ఉంటే నిర్ణీత గడువులోగా ఆన్‌లైన్ (Voter Helpline App) లేదా ఆఫ్‌లైన్ పద్ధతుల్లో దరఖాస్తు చేసుకోవాలని సూచించింది.