ఖమ్మం నగరంలో విషాద ఘటన చోటుచేసుకుంది. ఓ ప్రైవేట్ జూనియర్ కళాశాలలో విద్యార్థులకు పాఠం బోధిస్తున్న లెక్చరర్ అకస్మాత్తుగా గుండెపోటుకు గురై కుప్పకూలిపోయారు. క్లాస్రూమ్లో జరిగిన ఈ ఘటనతో విద్యార్థులు, సిబ్బంది తీవ్ర భయాందోళనకు గురయ్యారు.
సమాచారం ప్రకారం, లెక్చరర్ విద్యార్థులకు డెమో ఇస్తూ పాఠం వివరిస్తున్న సమయంలో ఒక్కసారిగా అస్వస్థతకు గురయ్యారు. కొద్దిసేపటికే నేలపై పడిపోవడంతో అక్కడ ఉన్నవారు వెంటనే స్పందించారు. పరిస్థితి విషమంగా కనిపించడంతో సహచర ఉపాధ్యాయులు, కళాశాల సిబ్బంది ఆయనను హుటాహుటిన సమీప ఆస్పత్రికి తరలించారు.
అయితే ఆస్పత్రికి చేరుకునేలోపే ఆయన మృతి చెందినట్లు వైద్యులు నిర్ధారించారు. ప్రాథమికంగా గుండెపోటే మరణానికి కారణమై ఉండొచ్చని తెలుస్తోంది. ఈ ఆకస్మిక ఘటన కళాశాలలో తీవ్ర విషాదాన్ని నింపింది.తమకు పాఠాలు చెప్పే అధ్యాపకుడు కళ్లముందే కుప్పకూలిపోవడంతో విద్యార్థులు షాక్కు గురయ్యారు. సహచర అధ్యాపకులు, కళాశాల యాజమాన్యం ఆయన మృతిపై తీవ్ర సంతాపం వ్యక్తం చేశారు. ఇటీవల గుండెపోటు ఘటనలు పెరుగుతుండటం మరోసారి ఆందోళన కలిగిస్తోంది.