విజయవాడలో వెలుగుచూసిన టెర్రర్ లింక్స్ కేసులో కీలక వివరాలు బయటకు వచ్చాయి. ఈ కేసులో మొత్తం 12 మంది పాత్ర ఉన్నట్లు పోలీసులు గుర్తించారు. సోషల్ మీడియా వేదికగా, ముఖ్యంగా ఇన్స్టాగ్రామ్ ద్వారా తీవ్రవాద భావజాలాన్ని ప్రచారం చేస్తున్నారని విచారణలో తేలింది.
పోలీసుల ప్రకారం, నిందితులు “IQIS” మరియు “ISIS” పేర్లతో రెండు వేర్వేరు గ్రూపులు ఏర్పాటు చేశారు. ఒక గ్రూపులో 5 మంది, మరో గ్రూపులో 7 మంది సభ్యులు ఉన్నట్లు గుర్తించారు. ఈ గ్రూపులలో ఉన్న సభ్యులు ఎక్కువగా ఇతర రాష్ట్రాలకు చెందినవారేనని అధికారులు వెల్లడించారు.
ఈ గ్రూపుల ద్వారా తీవ్రవాద భావజాలాన్ని ప్రచారం చేస్తూ, యువతను ఆకర్షించే ప్రయత్నం చేస్తున్నారని పోలీసులు తెలిపారు. ఈ కేసులో ఈరోజు అరెస్టయిన ముగ్గురు నిందితులు విజయవాడకు చెందినవారేనని, వారి నుంచి మొబైల్ ఫోన్లు మరియు ఇతర ఎలక్ట్రానిక్ పరికరాలను స్వాధీనం చేసుకున్నట్లు వెల్లడించారు.
ఈ అంశంపై ఐజీ త్రిపాఠి మాట్లాడుతూ, “ఇంకా ఎవరెవరు ఇందులో భాగస్వాములయ్యారో తెలుసుకునే దిశగా దర్యాప్తు కొనసాగుతోంది. వీరి ప్రధాన ఉద్దేశ్యం తీవ్రవాద భావజాలాన్ని ప్రోత్సహించడం, యువతను ప్రభావితం చేయడం” అని తెలిపారు.
అదే సమయంలో, నిందితులు డబ్బుల కోసం ఈ కార్యకలాపాలు చేస్తున్నారా లేదా మరేదైనా ఉద్దేశ్యం ఉందా అన్న కోణంలో కూడా పోలీసులు దర్యాప్తు చేస్తున్నారు. ఇప్పటికే ప్రత్యేక పోలీసు బృందాలు ఇతర రాష్ట్రాలకు వెళ్లాయని, మిగిలిన నిందితులను త్వరలోనే అదుపులోకి తీసుకుంటామని అధికారులు స్పష్టం చేశారు.
ఈ కేసు నేపథ్యంలో, సోషల్ మీడియా వేదికల ద్వారా జరుగుతున్న అనుమానాస్పద కార్యకలాపాలపై మరింత కట్టుదిట్టమైన నిఘా అవసరమని నిపుణులు సూచిస్తున్నారు.
