హైదరాబాద్ శివారులోని నార్సింగి పోలీస్ స్టేషన్ పరిధిలో తీవ్ర ఉద్రిక్తత చోటుచేసుకుంది. ప్రముఖ డ్యాన్సర్, యూట్యూబర్ మాధురి రాథోడ్ ఆత్మహత్యాయత్నానికి పాల్పడటం స్థానికంగా సంచలనం సృష్టించింది. ప్రేమ పేరుతో మోసం చేసిన యువకుడిపై పోలీసులు ఎలాంటి చర్యలు తీసుకోలేదన్న మనస్తాపంతోనే ఆమె ఈ అడుగు వేసినట్లు తెలుస్తోంది. ప్రస్తుతం ఆమె ప్రాణాలతో బయటపడినప్పటికీ, ఈ ఘటనకు సంబంధించిన పూర్తి వివరాలు వెలుగులోకి వచ్చాయి.
బాధితురాలి ఆరోపణల ప్రకారం.. ఈశ్వర్ సాయి అనే వ్యక్తి కొంతకాలంగా తనను ప్రేమిస్తున్నానని నమ్మించాడు. పెళ్లి చేసుకుంటానని చెప్పి నమ్మించి తనను మోసం చేశాడని మాధురి వాపోయారు. మోసపోయానని గ్రహించిన ఆమె వెంటనే పోలీసులను ఆశ్రయించి ఫిర్యాదు చేశారు. అయితే నార్సింగి పోలీసులు మాత్రం నిందితుడు ఈశ్వర్ సాయికి అనుకూలంగా వ్యవహరిస్తున్నారని, అతన్ని కాపాడే ప్రయత్నం చేస్తున్నారని తీవ్ర ఆరోపణలు గుప్పించారు. తనను మోసం చేసిన వ్యక్తిపై తక్షణమే కఠిన చర్యలు తీసుకోవాలని ఆమె ఎంతో కాలంగా వేడుకుంటున్నా ఎవరూ పట్టించుకోలేదని ఆవేదన వ్యక్తం చేశారు.
న్యాయం జరగలేదన్న తీవ్ర మనస్తాపంతోనే ఆమె తన ఇంట్లో ఫ్యాన్కు ఉరివేసుకుని ఆత్మహత్యకు యత్నించినట్లు కుటుంబ సభ్యులు తెలిపారు. గమనించిన వెంటనే కుటుంబ సభ్యులు, స్థానికులు ఆమెను రక్షించి తక్షణ చికిత్స నిమిత్తం సమీపంలోని ఆసుపత్రికి తరలించారు. ప్రస్తుతం ఆమె ఆసుపత్రిలో చికిత్స పొందుతున్నట్లు సమాచారం.
ఈ ఘటనపై సమాచారం అందుకున్న నార్సింగి పోలీసులు కేసు నమోదు చేసి దర్యాప్తును వేగవంతం చేశారు. మరోవైపు పోలీసులు నిందితుడిని రక్షిస్తున్నారంటూ వస్తున్న ఆరోపణలపై స్థానికంగా పెద్దఎత్తున చర్చ జరుగుతోంది. బాధితురాలికి న్యాయం చేయాలని, నిందితుడు ఈశ్వర్ సాయిని వెంటనే అరెస్ట్ చేయాలని పలువురు డిమాండ్ చేస్తున్నారు.