బంగ్లాదేశ్ ను భూకంపం కుదిపేసింది. దీంతో ఢాకా వేదికగా బంగ్లాదేశ్ వర్సెస్ ఐర్లాండ్తో జరిగిన మ్యాచ్కు అంతరాయం ఏర్పడింది. మిర్పూర్లోని శేర్–ఎ–బంగ్లా నేషనల్ స్టేడియంలో ఆటగాళ్లు, అంపైర్లు భద్రత నిమిత్తం ఆటను తాత్కాలికంగా ఆపాల్సి వచ్చింది.
5.7 తీవ్రతతో నమోదైన ఈ ప్రకంపనల కారణంగా ఆటగాళ్లు, అంపైర్లు వెంటనే ఆటను నిలిపివేశారు. ఆ సమయంలో ఐర్లాండ్ రెండో ఇన్నింగ్స్లో 55 ఓవర్లకు 165/5తో ఉంది. చిన్న భూకంపం కారణంగా ఆట ఆగిపోయింది అని క్రికెట్ ఐర్లాండ్ X (ట్విట్టర్) లో తెలిపింది. సుమారు 30 సెకన్ల తర్వాత పరిస్థితులు సురక్షితమని నిర్ధారించడంతో మ్యాచ్ మళ్లీ ప్రారంభమైంది. ఢాకా సహా దేశంలోని అనేక ప్రాంతాల్లో ప్రకంపనలు నమోదయ్యాయని బంగ్లాదేశ్ వాతావరణ శాఖ ప్రకటించింది. అదృష్టవశాత్తు స్టేడియంలో ఎలాంటి నష్టం, గాయాలు జరగలేదు.
క్రికెట్ మ్యాచ్కు భూకంపం అంతరాయం కలిగించిన చివరి ఘటన 2022లో జరిగింది. అప్పట్లో ట్రినిడాడ్లో జరిగిన ICC అండర్–19 వరల్డ్ కప్లో జింబాబ్వే–ఐర్లాండ్ మ్యాచ్ 5.2 తీవ్రత గల భూకంపం కారణంగా కొద్దిసేపు ఆగిపోయింది. జింబాబ్వే బ్యాటర్ బ్రియాన్ బెన్నెట్ స్ట్రైక్లో ఉండగా, ఐర్లాండ్ స్పిన్నర్ మాథ్యూ హంఫ్రీస్ ఓవర్ వేసుతున్న సమయంలో ఫ్రంట్–ఆన్ కెమెరా బాగా కంపించడం కనిపించింది.