ఆనకాపల్లి జిల్లా వైఎస్ఆర్సీపీ అధ్యక్షుడు, మాజీ మంత్రి గుడివాడ అమర్నాథ్ నర్సీపట్నంలో నిర్మాణంలో ఉన్న ప్రభుత్వ వైద్య కళాశాల పనులను పరిశీలిస్తూ కూటమి ప్రభుత్వంపై తీవ్ర స్థాయిలో విరుచుకుపడ్డారు. పీపీపీ మోడల్లో పది ప్రభుత్వ మెడికల్ కాలేజీలను ప్రైవేటీకరించే ప్రయత్నం పేదలతో చేసిన ద్రోహమని ఆయన విమర్శించారు. ఈ నిర్ణయం వలన వెనుకబడిన వర్గాల విద్యార్థులకు ఉచిత వైద్య విద్య అవకాశాలు దూరమవుతాయని, అవసరమైన వారికి అందుబాటు వైద్యం కరువవుతుందని హెచ్చరించారు.
వైఎస్ఆర్, వైఎస్ జగన్ మోహన్ రెడ్డి పాలనలోనే 18 కొత్త ప్రభుత్వ మెడికల్ కాలేజీల కోసం రూ.8,500 కోట్లు మంజూరైందని, ఇప్పటికే ఐదు కళాశాలలు ప్రారంభమై 750 అదనపు ఎంబీబీఎస్ సీట్లు ఏర్పాటయ్యాయని గుర్తుచేశారు. అయితే, చంద్రబాబు నాయుడు మూడు పర్యాయాలు ముఖ్యమంత్రిగా పనిచేసినా ఒక్క ప్రభుత్వ మెడికల్ కళాశాల కూడా నెలకొల్పలేదని, ఇప్పుడు మాత్రం ప్రభుత్వ డబ్బుతో నిర్మించిన కళాశాలలను ప్రైవేటు చేతుల్లోకి ఇవ్వాలని చూస్తున్నారని మండిపడ్డారు.
అమరావతిపై చంద్రబాబు నాయుడు ద్వంద్వ వైఖరిని ప్రదర్శిస్తున్నారని, రూ.1.09 లక్షల కోట్ల ప్రాజెక్టు ఖర్చులో ఆయన పాలనలో కేవలం 4% మాత్రమే ఖర్చు చేశారని అమర్నాథ్ ఎద్దేవా చేశారు. పులివెందుల మెడికల్ కాలేజ్ అనుమతులు రద్దు చేయడాన్ని ఆయన తీవ్రంగా ఖండించారు. ఇది పేద విద్యార్థుల అవకాశాలను నాశనం చేయడానికి ఉద్దేశపూర్వకంగా చేసిన చర్య అని వ్యాఖ్యానించారు.
ఆంధ్రప్రదేశ్ను “ఉత్తర కొరియా మోడల్”లో నడిపిస్తున్నారని, ఆయనను “ఆంధ్ర కిమ్”గా పిలుస్తూ, వైఎస్ఆర్సీపీ నాయకులపై తప్పుడు కేసులు, అరెస్టులు చేస్తూ, కార్పొరేట్ వర్గాలను కాపాడుతున్నారని తీవ్రంగా విమర్శించారు.