ఎఫ్డిఐ. విదేశీ ప్రత్యక్ష పెట్టుబడులు. గతంలో ఈ మాట ఎక్కువగా వినపడేది. రానురాను కేంద్ర పెద్దల నుంచి ఈ మాట వినపడడం మానేసింది. మళ్లీ ఇప్పుడు ప్రధాని నరేంద్ర మోడీ ప్రభుత్వం ఈ మాటను వినిపించేందుకు చర్యలు తీసుకుంటోంది.
దేశంలోకి విదేశీ ప్రత్యక్ష పెట్టుబడులను ఆహ్వానిస్తూ మోడీ ప్రభుత్వం నిర్ణయం తీసుకుంది. అంతే కాదు.. విదేశీ సంస్ధలకు ఎర్రతివాచీ పరిచి మరీ తీసుకురావాలని నిర్ణయించింది. ప్రధాని మోడీ అధ్యక్షతన జరిగిన ఓ కీలక సమావేశంలో ఈ మేరకు నిర్ణయం తీసుకున్నారు దేశంలోని ప్రధాన రంగాలైన రక్షణ, పౌర విమానయానం, ఫుడ్ ప్రాసెసింగ్ ల్లో విదేశీ పెట్టుబడులను ఆహ్వానించాలని ఆ సమావేవంలో నిర్ణయం తీసుకున్నారు. దీంతో యాపిల్ వంటి కంపెనీలో భారత్ లో తమ సొంత స్టోర్లు తెరవాలన్న కల కూడా నిజం కాబోతోంది.
ఈ కొత్త నిర్ణయంతో విదేశీ సంస్ధలు ఇక నుంచి విదేశీ పెట్టుబడుల ప్రోత్సాహక బోర్డు అనుమతి తీసుకోకుండా నేరుగా పెట్టుబడులతో భారత్ లోకి ప్రవేశించే అవకాశాలు ఉంటాయి. విదేశీ పెట్టుబడులకు భారతదేశం ఎంతో అనువైన దేశంగా ప్రపంచానికి చాటేందుకే ఈ కీలక నిర్ణయం తీసుకున్నారని మార్కెట్ వర్గాలు చెబుతున్నాయి. దేశాన్ని అంతర్జాతీయ తయారీ కేంద్రంగా తయారు చేసేందుకు చర్యల్లో భాగంగా ఇలాంటి నిర్ణయాలు తీసుకుంటున్నట్లు కేంద్ర మంత్రి నిర్మల సీతారామన్ అన్నారంటే దీని వెనుక ఎంత కసరత్తు జరిగిందో అర్ధం చేసుకోవచ్చు.