దేశ ఆర్థిక రాజధాని ముంబైలోని రియల్ ఎస్టేట్ మార్కెట్ ఎప్పుడూ రికార్డులతో వార్తల్లో ఉంటుంది. తాజాగా, జుహు బీచ్కు సమీపంలో ఉన్న ఒక చారిత్రక బంగ్లా భారీ ధరకు విక్రయించబడటం సంచలనంగా మారింది. ప్రముఖ నానావతి కుటుంబానికి చెందిన ఈ బంగ్లాను నొటందాస్ రియాల్టీ సంస్థ ఏకంగా రూ. 221 కోట్లకు సొంతం చేసుకుంది.
‘లీలా’ అనే పేరుతో పిలువబడే ఈ బంగ్లాకు 70 ఏళ్లకు పైగా చరిత్ర ఉంది. ఇది ముంబైలోని సంపన్న వర్గాల జీవనశైలికి ప్రతీకగా నిలుస్తోంది.1950ల కాలంలో దీనిని ‘ఆర్ట్ డెకో’ (Art Deco) వాస్తు శైలిలో నిర్మించారు. అప్పటి కాలపు కళాత్మక నిర్మాణ శైలికి ఇది ఒక అద్భుత నిదర్శనం.
మొత్తం 14,858 చదరపు అడుగుల ప్లాట్లో, 8,480 చదరపు అడుగుల బిల్డప్ ఏరియాలో ఈ బంగ్లా విస్తరించి ఉంది.ఈ బంగ్లాకు ‘గ్రేడ్ IIB’ (Grade IIB) వారసత్వ హోదా ఉంది. ముంబై హెరిటేజ్ కన్జర్వేషన్ కమిటీ నిబంధనల ప్రకారం, ఇలాంటి కట్టడాలను కూల్చివేసి కొత్తగా భారీ భవనాలను నిర్మించడానికి అనుమతి ఉండదు. కేవలం ఉన్న నిర్మాణాన్ని పునరుద్ధరించడం లేదా లోపల మార్పులు చేసుకోవడానికి మాత్రమే అవకాశం ఉంటుంది. అయినప్పటికీ, దీనికున్న చారిత్రక విలువ మరియు జుహు బీచ్కు దగ్గరగా ఉండటం వల్ల దీనికి ఇంత భారీ ధర లభించింది.
గత కొద్ది కాలంగా ముంబైలోని జుహు, మలబార్ హిల్స్ వంటి ప్రాంతాల్లో విలాసవంతమైన బంగ్లాలు మరియు ఫ్లాట్లకు విపరీతమైన గిరాకీ పెరిగింది. ప్రముఖ వ్యాపారవేత్తలు, బాలీవుడ్ స్టార్స్ ఇలాంటి చారిత్రక కట్టడాలను సొంతం చేసుకోవడానికి ఆసక్తి చూపుతుండటంతో ధరలు ఆకాశాన్నంటుతున్నాయి.