హైదరాబాద్ లో ప్రజల ప్రాణాలతో చెలగాటమాడుతున్న మరో కల్తీ ముఠా గుట్టును సైబరాబాద్ పోలీసులు రట్టు చేశారు. కూకట్పల్లి నియోజకవర్గ పరిధిలోని కైతలాపూర్లో గుట్టుచప్పుడు కాకుండా సాగుతున్న కల్తీ ఆహార తయారీ కేంద్రంపై ఎస్ఓటీ (SOT) పోలీసులు మెరుపు దాడులు నిర్వహించారు.
కైతలాపూర్లో ఒక షెడ్డులో ప్రమాదకరమైన రీతిలో ఆహార పదార్థాలు తయారు చేస్తున్నారన్న విశ్వసనీయ సమాచారంతో పోలీసులు ఈ దాడులు చేపట్టారు. అక్కడ జరుగుతున్న తయారీ విధానాన్ని చూసి అధికారులు సైతం విస్తుపోయారు.
వాడిన నూనెతోనే వంటలు: హోటళ్లలో వాడి పారేసిన ‘యూజ్డ్ ఆయిల్’ను (Used Oil) సేకరించి, దానితోనే మళ్లీ బిర్యానీలలో వాడే ఫ్రైడ్ ఆనియన్స్ (వేయించిన ఉల్లిపాయలు) తయారు చేస్తున్నట్లు పోలీసులు గుర్తించారు. ఇక్కడ తయారైన నాణ్యత లేని, అనారోగ్యకరమైన ఫ్రైడ్ ఆనియన్స్ను కూకట్పల్లి మరియు చుట్టుపక్కల ప్రాంతాల్లోని పలు హోటళ్లకు తక్కువ ధరకు సరఫరా చేస్తున్నట్లు విచారణలో తేలింది.
ఈ దాడుల్లో పోలీసులు భారీ ఎత్తున కల్తీ పదార్థాలను స్వాధీనం చేసుకున్నారు.480 లీటర్ల వాడిన నూనె (Used Oil),75 కిలోల కల్తీ ఫ్రైడ్ ఆనియన్స్.
రవాణాకు ఉపయోగిస్తున్న ఒక ఆటోను పోలీసులు సీజ్ చేశారు.
ఈ అక్రమ వ్యాపారానికి పాల్పడుతున్న షేక్ యూసఫ్, రిజ్వాన్ బిన్ సలాం అనే ఇద్దరు వ్యక్తులను పోలీసులు అరెస్ట్ చేశారు. వీరిపై వివిధ సెక్షన్ల కింద కేసులు నమోదు చేసి రిమాండ్కు తరలించారు.
హోటళ్లు మరియు రెస్టారెంట్లలో ఆహారం తీసుకునేటప్పుడు ప్రజలు అప్రమత్తంగా ఉండాలని పోలీసులు సూచించారు. ముఖ్యంగా ఫ్రైడ్ ఆనియన్స్ వంటి పదార్థాలు చూడటానికి ఆకర్షణీయంగా ఉన్నా, అవి ఎక్కడ తయారవుతున్నాయో గమనించాలని కోరారు. లాభార్జనే ధ్యేయంగా ప్రజల ఆరోగ్యాన్ని పణంగా పెడితే కఠిన చర్యలు తప్పవని యజమానులను హెచ్చరించారు.