ఢిల్లీలోని ఉత్తమ్ నగర్ ప్రాంతంలో హోలీ వేడుకల సమయంలో జరిగిన ఘర్షణ ఒక యువకుడి ప్రాణాలను తీసింది. ఈ ఘటనతో ప్రాంతంలో ఉద్రిక్త పరిస్థితులు నెలకొనగా, వాహనాలకు నిప్పంటించడం మరియు రోడ్లను దిగ్బంధించడం వంటి ఘటనలు చోటుచేసుకున్నాయి. పరిస్థితిని అదుపులోకి తీసుకురావడానికి పోలీసులు భారీగా మోహరించారు.
మార్చి 4న దక్షిణ పశ్చిమ ఢిల్లీలోని ఉత్తమ్ నగర్ ప్రాంతంలో హోలీ వేడుకల సందర్భంగా పొరుగువారిలో చిన్న వివాదం మొదలైంది. అది కొద్ది సేపటికే పెద్ద గొడవగా మారి రెండు వర్గాల మధ్య తీవ్ర ఘర్షణకు దారితీసింది. ఈ ఘటనలో 25 ఏళ్ల తరుణ్ అనే యువకుడు తీవ్రంగా గాయపడ్డాడు. అతన్ని వెంటనే ఆసుపత్రికి తరలించినప్పటికీ చికిత్స పొందుతూ మృతి చెందాడు.
ఈ ఘటన తర్వాత ఢిల్లీ పోలీసులు వెంటనే స్పందించి కేసు నమోదు చేశారు. ఘర్షణకు సంబంధించి నలుగురు అనుమానితులను అదుపులోకి తీసుకున్నారు. ఈ విషయాన్ని ద్వారకా జిల్లా డీసీపీ కుశాల్ పాల్ సింగ్ ధృవీకరించారు. ఘటన జరిగిన ప్రాంతాన్ని సెక్టర్లు, సబ్సెక్టర్లుగా విభజించి పోలీసులు పర్యవేక్షణ పెంచినట్లు తెలిపారు.
ఇదిలా ఉండగా మార్చి 6న తరుణ్ మృతికి నిరసనగా కొందరు ఆందోళనకు దిగారు. హిందూ రాజకీయ సంస్థలకు చెందిన కార్యకర్తలు ప్రధాన రహదారులను గంటల పాటు దిగ్బంధించారు. దీంతో ఉత్తమ్ నగర్ ప్రాంతంలో ట్రాఫిక్ పూర్తిగా స్థంభించింది.