పశ్చిమ ఆసియాలో కొనసాగుతున్న ఉద్రిక్త పరిస్థితుల నేపథ్యంలో ప్రధానమంత్రి నరేంద్ర మోదీ శుక్రవారం అన్ని రాష్ట్రాలు, కేంద్రపాలిత ప్రాంతాల ముఖ్యమంత్రులతో కీలక సమావేశం నిర్వహించనున్నారు. దేశం తీసుకుంటున్న చర్యలు, సిద్ధతపై సమీక్ష చేయడం ఈ సమావేశం ప్రధాన ఉద్దేశ్యం.
ఈ సమావేశంలో ‘టీమ్ ఇండియా’ భావనతో సమన్వయం సాధించి, దేశవ్యాప్తంగా ఒకే విధమైన చర్యలు చేపట్టడంపై చర్చించనున్నారు. అయితే, వచ్చే నెల అసెంబ్లీ ఎన్నికలు జరగనున్న రాష్ట్రాలు ఈ సమావేశంలో పాల్గొనవు. మోడల్ కోడ్ ఆఫ్ కండక్ట్ (MCC) అమల్లో ఉండటం వల్ల ఈ నిర్ణయం తీసుకున్నారు.
కేరళ, అసోం, పుదుచ్చేరిలో ఏప్రిల్ 9న పోలింగ్ జరగనుండగా, తమిళనాడులో ఏప్రిల్ 23న ఓటింగ్ జరుగుతుంది. పశ్చిమ బెంగాల్లో రెండు దశల్లో (ఏప్రిల్ 23, 29) ఎన్నికలు నిర్వహించనున్నారు. మే 4న ఓట్ల లెక్కింపు జరుగుతుంది.
యుద్ధ ప్రభావం రైతులపై పడకుండా ఉండేందుకు ఎరువుల సరఫరా కొనసాగించడంపై ప్రత్యేక దృష్టి పెట్టారు. అలాగే దేశంలో విద్యుత్ కొరత రాకుండా పవర్ ప్లాంట్ల పరిస్థితిని సమీక్షించారు. పార్లమెంట్లో ప్రధాని మాట్లాడుతూ… హర్మూజ్ జలసంధిలో నౌకల రాకపోకలు కష్టతరంగా మారాయని తెలిపారు. అయినప్పటికీ, భారత నౌకలకు సురక్షిత మార్గం కల్పించేందుకు ప్రభుత్వం కృషి చేస్తోందని చెప్పారు.
పశ్చిమ ఆసియా సంక్షోభం కొనసాగుతున్న నేపథ్యంలో, దేశ ఆర్థిక, ఇంధన భద్రతను కాపాడేందుకు కేంద్ర ప్రభుత్వం సమగ్ర చర్యలు తీసుకుంటోంది. సీఎంలతో జరగనున్న ఈ సమావేశం కీలక నిర్ణయాలకు దారి తీసే అవకాశం ఉంది.