జెట్ ఎయిర్ వేస్ లాభాల బాటలో గాల్లో తేలుతోంది. ఈ ఏడాది నాలుగో త్రైమాసికం ముగిసే నాటికి జెట్ ఎయిర్ వేస్ లాభం 426 కోట్లకు చేరుకుంది. ఈ ఏడాది ఎవరూ ఊహించనంతగా విమాన ఇంధన ధరలు తగ్గాయి. దీంతో ప్రయాణీకులు కూడా పెరగడంతో ఈ లాభాలు వచ్చాయని సంస్ధ భావిస్తోంది. గత ఏడాది జెట్ ఎయిర్ వేస్ భారీగా నష్టాలను చవి చూసింది.
ఆ సంవత్సరం ఏకంగా 1803 కోట్ల రూపాయల నష్టం వచ్చింది. ఈ ఏడాది వచ్చిన లాభాలతో సంస్ధకు కాసింత ఉపశమనం కలిగింది. ఇక ఆదాయం విషయానికి వస్తే అది కూడా బాగానే పెరిగింది. ఇంతకు ముందు ఆదాయం 5,064.52 కోట్ల రూపాయలుంటే ఈ ఏడాది అది 5245.28 కోట్లకు పెరిగింది. వీటిన్నిటి కంటే ముఖ్యమైనది కంపెనీ ఖర్చులు భారీగా తగ్గాయి.
ఈ ఏడాది 4848.14 కోట్ల రూపాయల వరకూ ఖర్చులు తగ్గాయి. ఇక ఇంధన వ్యయం 1334.47 కోట్ల రూపాయల నుంచి 999 కోట్ల రూపాయలకు తగ్గింది. జెట్ ఎయిర్ వేస్ కు ఇంధనంలోనే దాదాపు 300 కోట్ల రూపాయల మిగులు కనిపించింది.