మాస్ హీరో గోపీచంద్ హీరోగా, నయనతార హీరోయిన్ గా బి. గోపాల్ దర్శకత్వంలో ఐదేళ్ల కిందట ఆరడుగుల బుల్లెట్ అనే సినిమా తెరకెక్కింది. ఈ సినిమాకు వక్కంతం వంశీ కథను అందించారు. అబ్బూరి రవి మాటలు రాశారు. మణిశర్మ మ్యూజిక్ అందించారు. తాండ్ర రమేశ్ నిర్మించిన ఈ సినిమా ఆర్థిక ఇబ్బందులతో విడుదల ఆగిపోయింది. ఈ సినిమా మీద అప్పట్లో భారీ అంచనాలు ఉన్నాయి. గోపీచంద్ కు మాస్ హీరోగా గుర్తింపు ఉంది. ఇక బి. గోపాల్ అంటే చాలు మాస్ సినిమాలు, ఫ్యాక్షన్ సినిమాలు గుర్తుకొస్తాయి.గోపీచంద్, బి. గోపాల్ కలయికతో ఒక మంచి మాస్ ఎంటర్ టైనర్ రావడం పక్కా అని అభిమానులు ఆశించారు. అప్పట్లో ఈ సినిమాపై భారీ అంచనాలు ఉన్నాయి.
అయితే ఈ సినిమా పలు సార్లు విడుదల వాయిదా పడింది. ఓ దశలో ఓటీటీలో ఈ మూవీ విడుదల చేస్తారన్న టాక్ కూడా నడించింది. కానీ అలా జరగలేదు. అసలు ఈ సినిమా విడుదలవుతుందా? లేక పెండింగ్ చిత్రాల జాబితాలోకి వెళ్లిపోతుందా? అన్న సందేహం కూడా వ్యక్తమయింది. ఈ క్రమంలో త్వరలో మూవీని సొంతంగా విడుదల చేయబోతున్నట్టు నిర్మాత తాండ్ర రమేశ్ ప్రకటించారు. ఈ సినిమాకు ఉన్న ఆర్థిక ఇబ్బందులన్నీ తొలగిపోయాయని ఆయన చెప్పారు.
అయితే ఎప్పుడో అయిదేళ్ల క్రితం రాసుకున్న కథ ఇప్పుడు ఆడుతుందా? లేదా ? అన్నది సందేహంగా మారింది. ఇప్పటికే పలుమార్లు విడుదల తేదీ ప్రకటించి, ఆ తర్వాత ఆగిపోవడంతో ఈ సినిమా పట్ల ఎవరికీ పెద్దగా ఆసక్తి కనిపించడం లేదు. కనీసం సినిమా విడుదల అయితే పెట్టిన పెట్టుబడి అయినా దక్కించుకుందామన్న ఉద్దేశ్యంతో నిర్మాత రిలీజ్ చేసేందుకు సిద్ధపడ్డారని సమాచారం. మరి ఐదేళ్ల తర్వాత విడుదలవుతున్న ఆరడుగుల బుల్లెట్టు పేలుతుందో లేదో చూడాలి.
Also Read