కర్ణాటక సీఎం పదవి సంక్షోభానికి తాత్కాలికంగా తెరపడినట్లు కనిపిస్తోంది. అల్పాహారం కలిసి చేసిన అనంతరం, కర్ణాటక సీఎం సిద్ధరామయ్య మరియు ఆయన డిప్యూటీ డీకే శివకుమార్ మీడియాతో మాట్లాడారు. ఈ సందర్భంగా సిద్ధరామయ్య, తమ మధ్య ఎలాంటి విభేదాలు లేవని స్పష్టం చేశారు. మేము కలిసి ముందుకు సాగుతామని చర్చించుకున్నాము. మా మధ్య ఎలాంటి తేడాలు లేవు, భవిష్యత్తులో కూడా ఉండవు అని సిద్ధరామయ్య తెలిపారు.
అల్పాహార సమయంలో రాజకీయాలపై ఏమీ చర్చించలేదని సిద్ధరామయ్య తెలిపారు. అల్పాహారం బాగా జరిగింది. అక్కడ ఎలాంటి రాజకీయ చర్చ జరగలేదు. కేవలం అల్పాహారం మాత్రమే చేశాం. డీకేఎస్ ఈ రోజు మా ఇంటికి వచ్చారు… అలాగే ఆయన తన ఇంటికి నన్ను ఆహ్వానించారు అని సీఎం అన్నారు.
2028 ఎన్నికలపై చర్చించామని, కాంగ్రెస్ మళ్లీ విజయం సాధిస్తుందని నమ్మకంగా ఉన్నామని చెప్పారు.మా అజెండా 2028 ఎన్నికలు. స్థానిక సంస్థల ఎన్నికలు కూడా ముఖ్యమైనవి. వీటిపై చర్చించాం. 2028లో కాంగ్రెస్ను తిరిగి అధికారంలోకి తీసుకురావడంపై కూడా చర్చించాం. మేము కలిసి ముందుకు సాగుతాం. మా మధ్య ఎలాంటి భేదాభిప్రాయాలు లేవు, భవిష్యత్తులో కూడా ఉండవు అని అన్నారు.
సీఎం పదవిపై మీడియాలో అనవసర గందరగోళం సృష్టించారని సిద్ధరామయ్య తెలిపారు. హైకమాండ్ ఏం చెబితే అదే చేస్తాం. ఇకపై ఎలాంటి గందరగోళం ఉండదు. ఇప్పటివరకూ కూడా లేదు. కొంతమంది మీడియా సిబ్బంది గందరగోళం సృష్టించారు అన్నారు. బీజేపీ మరియు జేడీఎస్ తప్పుడు ఆరోపణలు చేస్తున్నారని సీఎం విమర్శించారు. బీజేపీ, జేడీఎస్ అవిశ్వాస తీర్మానం తెస్తామని చెబుతున్నారు. వారందరూ కలిపి 60, జేడీఎస్ 18. మన సంఖ్యకి వారు సాటిరారు. మనం 140మంది. ఇది వ్యర్థ ప్రయత్నం. వారి తప్పుడు ఆరోపణలను ఎదుర్కొంటాం అని చెప్పారు.
డీకే శివకుమార్ కూడా తాము కాంగ్రెస్కు నిబద్ధత కలిగిన సైనికులమని, హైకమాండ్ నిర్ణయాన్నే అనుసరిస్తామని చెప్పారు. నాయకత్వ విషయానికొస్తే, హైకమాండ్ నిర్ణయమే మా నిర్ణయం. మేము ఎల్లప్పుడూ పార్టీకి నిస్వార్థ సైనికులమై ఉన్నాం. దేశంలో పార్టీ కష్టకాలంలో ఉంది, మాకు తెలుసు అని చెప్పారు. కర్ణాటక 2028లో ప్రభుత్వాన్ని మళ్లీ ఏర్పరుస్తుంది. 2029లో కూడా మల్లికార్జున ఖర్గే మరియు రాహుల్ గాంధీ నాయకత్వంలో ముందుకు సాగుతాం అని ఆయన అన్నారు.