చంద్రగ్రహణం..ఆలయాల మూసివేత

చంద్రగ్రహణం సందర్భంగా తెలుగు రాష్ట్రాల్లోని అనేక ఆలయాలు ఆదివారం రాత్రి (సెప్టెంబర్ 7) నుంచి సోమవారం ఉదయం (సెప్టెంబర్ 8) వరకు మూసివేయబడనున్నాయి. చిల్కూరు బాలాజీ ఆలయ నిర్వాహకులు సోమవారం ఉదయం అభిషేకాలు పూర్తయిన తర్వాత ఉదయం 8 గంటలకు ఆలయాన్ని భక్తుల కోసం తిరిగి తెరవనున్నట్లు ప్రకటించారు.

తిరుమల తిరుపతి దేవస్థానాల (TTD) ఆధ్వర్యంలోని హైదరాబాద్‌లోని అన్ని శ్రీ వెంకటేశ్వర ఆలయాలు కూడా గ్రహణ సమయంలో మూసివేయబడతాయి.యాదగిరిగుట్టలోని శ్రీ లక్ష్మీ నరసింహస్వామి ఆలయం, బిర్లా మందిర్ వంటివి కూడా మూసివేయబడతాయని, గ్రహణం ముగిసిన తర్వాతే తిరిగి తెరవనున్నారు.

గ్రహణ సమయంలో ప్రతికూల శక్తులు పెరిగిపోతాయని, వాతావరణం ఆధ్యాత్మికంగా అపవిత్రమవుతుందని నమ్మకం. విగ్రహ పవిత్రతను కాపాడేందుకు ఈ సమయంలో గర్భగుడిని మూసివేస్తారు. పురాణాలు గ్రహణాన్ని రాహు, కేతువులు (ఆధ్యాత్మిక చాయాగ్రహాలు) సూర్యుడు లేదా చంద్రుణ్ణి మింగడంగా వర్ణిస్తాయి. ఇవి దోషకరమైన సమయాలుగా పరిగణించబడతాయి కాబట్టి ఆలయాల్లో కైంకర్యాలు నిలిపివేస్తారు.

గ్రహణ సమయంలో పూజ, హరతి, అభిషేకం జరగవు. భక్తులు మాత్రం మంత్రజపం, ధ్యానం, ఉపవాసం వంటివి చేసి దుష్ప్రభావాలు దూరమవుతాయని విశ్వసిస్తారు.గ్రహణం ముగిసిన తర్వాతే ఆలయాలు మళ్లీ తెరుస్తారు. ముందుగా పుణ్యాహవచనం వంటి శుద్ధి క్రతువులు చేసి, ఆపై నైవేద్యం సమర్పిస్తారు.