ప్రకాశం జిల్లా కేంద్రమైన ఒంగోలు నగరంలో ‘చెడ్డీ గ్యాంగ్’ సంచరిస్తోందన్న వార్త స్థానిక ప్రజలను భయాందోళనలకు గురిచేస్తోంది. నగరంలోని ఇందుర్తి నగర్ పరిసర ప్రాంతాల్లో అర్ధరాత్రి వేళ ఐదుగురు సభ్యుల ముఠా అనుమానాస్పదంగా తిరుగుతూ సీసీ టీవీ (CCTV) కెమెరాలకు చిక్కడంతో ఈ కలకలం రేగింది.
అర్ధరాత్రి దాటిన తర్వాత ఒంటిపై కేవలం నిక్కర్లు (చెడ్డీలు) ధరించిన ఐదుగురు వ్యక్తులు కాలనీలోకి ప్రవేశించారు. వారు అక్కడి వీధుల్లో తిరుగుతూ, తాళాలు వేసి ఉన్న ఇళ్లను, ఒంటరిగా ఉన్న ఇళ్లను నిశితంగా పరిశీలిస్తూ (రెక్కీ నిర్వహిస్తూ) చక్కర్లు కొట్టారు. ఉదయం పూట కాలనీవాసులు తమ ఇళ్లకు ఉన్న సీసీ కెమెరాల పుటేజీని పరిశీలించగా, ఈ ఐదుగురు సభ్యుల ముఠా తిరుగుతున్న దృశ్యాలు స్పష్టంగా కనిపించాయి.
సీసీ కెమెరా దృశ్యాల ఆధారంగా ఇందుర్తి నగర్ నివాసితులు తక్షణమే స్థానిక పోలీసులకు ఫిర్యాదు చేశారు. ఈ ముఠా సంచరిస్తున్న సమాచారంతో నగర ప్రజలు, ముఖ్యంగా రాత్రి వేళల్లో ఒంటరిగా ఉండే మహిళలు తీవ్ర భయాందోళనలు వ్యక్తం చేస్తున్నారు. అనుమానాస్పద వ్యక్తులు కనిపిస్తే వెంటనే డయల్ 100 లేదా స్థానిక పోలీస్ స్టేషన్కు సమాచారం అందించాలని అధికారులు సూచించారు.